Toshkentdagi “G‘oyib ota” qabristoni go‘rkovi Hojiakbar Fozilov YouTube’dagi “Daryo media” kanaliga bergan intervyusida bu kasbni tanlashining sabablari va faoliyati davomida uni ajablantirgan voqealar haqida gapirdi.
— Bu kasb tanlanmaydi. Alloh yuqtirmasa, hech kim go‘rkov bo‘lolmaydi. Otam rahmatli 2002-yili olamdan o‘tganlaridan endigina 12 yoshli bolakay edim. Qabrlari “Chig‘atoy” qabristonida. Otamni sog‘inganda qabristonga borardim, u yerlarni tozalab yurardim. U yerdagi Qobil va Qudrat ismli go‘rkovlar o‘zlariga yaqin olib, ish o‘rgatishgan. Bir-ikki marta qabr qazishga yordam berganimdan keyin ko‘nglimda bu kasbga nisbatan mehr paydo bo‘lgan.
Bolaligimda qabristonning yonidan o‘tishga qo‘rqadigan bola bo‘lganman. Bu ish bilan shug‘ullanishim akalarimga ham yoqmagan. “Bu ishni qilmasin”, deb tanbeh ham berishgan. Ammo har kim qo‘lidan kelgan ishni qiladi. Shu kungacha o‘zimni bir nechta sohalarda sinab ko‘rganman: qassobga shogird tushdim, savdo-sotiqqa ham aralashib ko‘rdim. Ammo hech birida o‘zimni topolmadim.
13 yoshda ustozlarga yordamlashishni boshlagan bo‘lsam, 15 yoshimda mustaqil qabrni qaziganman. Tanam baquvvat bo‘lgani va ixlosim baland bo‘lgani uchun qiyinchiligi sezilmagan.
Ilgari vaqtlarda odamlar go‘rkovga qiz berishmagan, bu kasb egalariga juda past nazar bilan qarashgan. Hozirgi kunga kelib go‘rkovlik ham eng yaxshi kasblardan biri hisoblanadi. To‘g‘ri, qora ish, ammo odamlarning mushkulini oson qiladi. Dindan xabari bor insonlar bu kasb mashaqqati va zarurligini yaxshi bilishadi, deydi go‘rkov Hojiakbar Fozilov.
Qahramonimiz faoliyati davomida anglab yetgan haqiqatlari va qabristondagi sirli voqealar haqida gapirdi
— Feʼli tor insonning har sohada ishi bitishi qiyin. Masalan, uy qurdirmoqchi bo‘lsa, ustalar “shuncha harakat qilyapmiz, nega bitmayapti” deyishadi. Hatto uyingizga kelsa ham nimalardir o‘zgarib ketadi. Bu hayotda feʼl-atvor ham muhim ahamiyatga ega. Imkon qadar ochiq ko‘ngil bo‘lish va atrofdagilarga zarari tegmaydigan bo‘lish kerak. Dilxiralik bilan hech kim baraka topmaydi.
Yaqinda bir yigitni buvisining yoniga qo‘ydik. U o‘z joniga qasd qilib, olamdan o‘tgan ekan. Yer kovlayotganimda buvisining qabri oldidagi archada ipga bog‘lanib ilib qo‘yilgan qulfga ko‘zim tushdi. Uni olib, ukasiga berdim. “Oxiri akamning boshiga yetishibdi-da”, dedi. Afsuski, mana shunday voqealar ham bo‘lib turadi. Hasad sabab insonlar bir-birlarga yomonlik qilishganini va og‘ir gunohga botishganini bilmay qolishadi. Shunday insonlar borki, ro‘zg‘origa pul topmasa ham bunday jirkanch ishlarni qilishga mablag‘ topishadi, deydi go‘rkov.
Hojiakbar Fozilov qanday insonlarga qabr qaziyotganda ruhan qiynalishi haqida gapirdi
-VU-ye5e5.jpg)
— Yosh bolalarga qabr qaziyotganda qiynalaman. O‘tgan yili 12 yoshli bolani tuproqqa qo‘ydik — boshi bilan yiqilib, jiddiy jarohat olgan ekan. Uni ko‘rib, farzandlarim haqida o‘yladim. Yaratgandan hech bir ota-onani farzand dog‘i bilan sinamasligini so‘radim. Chunki inson qo‘lidan moli ketsa, chidaydi, ammo ko‘z oldida bolasini so‘lishiga qarashi juda og‘ir. Yaqinda 8 oylik go‘dakni olib kelishdi. 4-5 yoshli aka-opalari olma yeyotganda, bolakay ham ber deb so‘ragan. Ikkitagina tishi bor ekan, olmadan bir bo‘lak tishlagan-u, tiqilib qolgan. Bolakay baquvvat va shu qadar shirin ediki, qarab ko‘z to‘ymasdi.
Keyin yosh bolalarning yetim qolgani ko‘rish ham juda og‘ir. 3-4 yil avval er-xotin ketma-ket bir yarim yil ichida vafot etishdi. Ularning ikki farzandi bor ekan, otasini yerga qo‘yayotganda ham, onasining yuziga tuproq tortayotganida ham nima bo‘lganligini tushunishmadi. Har gal shu qabrlar oldidan o‘tayotganda, bolalarning ahvoli nima kechayotgan ekan, deb o‘ylab qolaman, deydi go‘rkov Hojiakbar Fozilov.
Qahramonimiz odamlarning qabr ziyoratiga bo‘lgan munosabati anchayin o‘zgargani haqida kuyunib gapirdi
-GP5f6I5r.jpg)
— Afsuski, ko‘pchilik hamyurtlarimizning qabristonga bo‘lgan munosabati ancha o‘zgardi. “G‘oyib ota” qabristoni 5 gektar maydonni egallagan, bu yerda 11 mingdan ziyod qabr bor. Taxminan olganda, o‘sha qabrlarning ikki mingtasidan xabar olinadi. Qabristonni obodonlashtirish uchun 5 ta xodim biriktirilgan, yiliga hisoblaganda bor-yo‘g‘i 3 marta bitta qabr atrofida tozalay oladi. Olaylik, uyingizning derazasini bir hafta ochib qo‘ysangiz, ham yer chang bo‘lib ketadi. Qabristonlar ham eʼtiborga muhtoj, bir parcha go‘shtligidan boshlab farzandni ulg‘aytirgan ota-ota, o‘lganidan keyin bolalarining yo‘qlab kelishini kutishadi, deydi go‘rkov Hojiakbar Fozilov.
Hojiakbar Fozilov faoliyati davomida qazilishi juda qiyin kechgan qabrlar haqida gapirdi
— Ikki marta qabr qazishga juda qiynalganman. Ancha yil avval bir qabrni kovlashim kerak bo‘ldi, ammo yer shu qadar qattiqlik qilganki, ko‘zimdan yosh chiqib ketgan. Mayitning yaqinlariga vaʼda berganim uchun arang kovlaganman, ammo juda qiyin kechgan.
Undan keyin yaqinda shunday voqea bo‘ldi. Shomga tayyor bo‘lsin, deyishdi. Ammo ha deganda qabr ochilavermadi, oxiri mayitning yaqinlariga qo‘ng‘iroq qilsak, “Bizning ham ishimiz bitmayapti, ekspertizaga olib ketishdi”, degan xabarni oldim. Qabr kovlayapmiz, ammo u o‘pirilib tushyapti yoki tuproq umuman olinmay qolyapti. Yer yumshoq bo‘lsa, nega bunday bo‘lyapti, deb hayron bo‘ldik. Shomga deyilgan qabr yarim kechasi tayyor bo‘ldi. Qo‘llarim yorilib, qadoq bo‘lib ketdi. Ertasi kuni mayitni olib kelishdi, yaqinlaridan u qanday inson ekanligi haqida sekin so‘radim. Bilsam, u inson hayotligida ichkilikka ruju qo‘ygan inson bo‘lgan ekan, deydi go‘rkov Hojiakbar Fozilov.
Suhbatni to‘liq holda YouTube’dagi “Daryo media” kanalida tomosha qilishingiz mumkin.
Izoh (0)