AQSHda o‘qish uchun viza olmoqchi bo‘lgan xorijlik talabalarning ijtimoiy tarmoqlarini tekshirish majburiy bo‘ladi. Bu haqda davlat kotibi Marko Rubio tomonidan imzolangan diplomatik notaga tayanib, Politico xabar berdi.
Hujjatga ko‘ra, Amerika elchixonalari va konsulliklariga talabalar hamda almashinuv dasturlari vizalari (F, M va J toifalari) uchun yangi suhbatlarni o‘tkazishni vaqtincha to‘xtatish topshirilgan. Ushbu qaror ijtimoiy tarmoqlarni majburiy tekshirishni kengaytirishga tayyorgarlik ko‘rish doirasida qabul qilingan.
Tashabbus amaliyotga joriy etilsa, viza berish jarayonini ancha sekinlashtirishi va xorijlik talabalar hisobiga daromad oladigan ko‘plab universitetlarga salbiy ta’sir ko‘rsatishi mumkin. Avvalroq AQSH prezidenti ma’muriyat ijtimoiy tarmoqlarni tekshirish bo‘yicha ba’zi talablarni joriy qilgan edi. U Isroilning G‘azodagi amaliyotiga qarshi namoyishlarda ishtirok etishda gumonlangan talabalarga nisbatan joriy etilgandi. Ijtimoiy tarmoqlarda aynan nimalar tekshirilishiga aniqlik kiritilmagan. Hujjatda terrorizm va antisemitizmga qarshi kurashga qaratilgan farmonlar tilga olingan.
Davlat departamentidagi ko‘plab xodimlar tekshiruvlar bo‘yicha avvalgi ko‘rsatmalarning noaniqligidan shikoyat qilgan. Masalan, X ijtimoiy tarmog‘ida Falastin bayrog‘i tasvirining e’lon qilinishi arizani qo‘shimcha ko‘rib chiqish uchun asos bo‘lishi mumkinmi yoki yo‘qligi tushunarsiz.
Tanqidchilarga ko‘ra, Tramp ma’muriyati bunday qoidalardan universitetlarga, xususan, Garvard kabi elita muassasalariga bosim o‘tkazish uchun foydalanadi.
26-may kuni AQSH prezidenti Donald Tramp Garvard universitetini 3 milliard dollarlik grant mablag‘idan mahrum qilishi mumkinligini ma’lum qildi va uning xorijlik talabalarini tanqid qilib, “antisemitizm”da aybladi. 22-may kuni AQSH prezidenti ma’muriyati Garvard universitetining xorijlik talabalarni qabul qilish huquqini rasman to‘xtatdi.
23-may kuni AQSHdagi sud Garvardga nisbatan qo‘yilgan xorijiy talabalarni qabul qilish taqiqini vaqtincha to‘xtatib turdi. Garvard universiteti Tramp ma’muriyatiga qarshi 10 banddan iborat da’vo arizasi kiritdi. Ular orasida ma’muriy tartib-qoidalar to‘g‘risidagi qonun hamda AQSH konstitutsiyasining so‘z va yig‘ilish erkinligi haqidagi birinchi tuzatishi buzilishi mavjud.
Izoh (0)