AQSH prezidenti Donald Tramp 2030-yilgacha kamida 10 ta yangi yadroviy reaktor qurishni buyurdi.
Bu haqda Oq uy matbuot xizmati xabar berdi.
Hujjatga ko‘ra, Tramp “2030-yilgacha tugallangan loyihalar asosida 10 ta yangi reaktor qurish”ni ishga tushirishni buyurgan, shuningdek, mavjud reaktorlarda elektr energiyasi ishlab chiqarishni 5 GVt ga oshirish bo‘yicha topshiriq bergan. Bundan tashqari, u Energetika vazirligi rahbariga mudofaa vaziri bilan kelishilgan holda Pentagon ehtiyojlari uchun yopilgan atom elektr stansiyalarini qayta ishga tushirish yoki o‘zgartirish imkoniyatlarini baholashni topshirdi.
Amerika maʼmuriyati rahbari AQSH Energetika vazirligiga “atom energetikasini qo‘llab-quvvatlash bo‘yicha faoliyatga ustuvor ahamiyat berish”, jumladan, “yopilgan atom elektr stansiyalarini qayta ishga tushirish, ishlayotgan atom stansiyalarida energiya ishlab chiqarishni ko‘paytirish va ilgari to‘xtatilgan reaktorlar qurilishini yakunlash uchun resurslar bilan taʼminlash”ni buyurdi.
Bundan tashqari, Tramp Energetika vazirligiga “yadro yoqilg‘isini yetkazib berish zanjirining barcha jihatlarini yo‘lga qo‘yish” va atom energetikasi texnologiyalarini rivojlantirish uchun moliyalashtirishni, jumladan, “grantlar, kreditlar va investitsiya kapitali” orqali birinchi o‘ringa qo‘yishni topshirdi.
Izoh (0)