AQSh xorijlik talabalarni onlayn-ta’lim sabab deportatsiya qilish to‘g‘risidagi rejasidan voz kechdi

Donald Tramp administratsiyasi onlayn rejimda o‘qiydigan xorijlik talabalar yangi o‘quv yilidan boshlab AQSh hududini tark etishlari to‘g‘risidagi qarorini bekor qildi. Bu haqda Boston okrug sudida AQSh hukumatiga qarshi mamlakat universitetlari tomonidan kiritilgan da’vo yuzasidan o‘tkazilgan eshituvlar vaqtida e’lon qilindi, deb xabar beradi CNN.

Iyul oyining boshida AQSh hukumati kuzgi semestrdan boshlab masofaviy dasr o‘tish rejimi amalga tatbiq etilsa, mamlakatga F-1 va M-1 vizasi bilan kelgan talabalar mamlakatni tark etishi yoki boshqa ta’lim muassasiga o‘qishini ko‘chirishi lozimligi to‘g‘risida qaror qabul qilgan.

Bunga javoban Garvard universiteti va Massachusets texnologiyalar instituti AQSh prezidenti administratsiyasining qarori yuzasidan Boston okrug sudiga shikoyat qilgandi.

Manbalarning so‘zlariga ko‘ra, Oq uy taqiq to‘g‘risidagi qarori va uning ijrosi yaxshi o‘ylanmagani, shu sababli mazkur masalani AQShda ta’lim olayotgan emas, balki yangi keladigan xorijlik talabalarga nisbatan qo‘llash lozimligini tan olgan.