Qozog‘iston qurolli kuchlarining jangovar tayyorgarligini tekshirish uchun 2-5-iyun kunlari mamlakatning qator hududlarida tadbirlar o‘tkaziladi. Bu haqda mamlakat Mudofaa vazirligiga tayanib, “KazTag” xabar berdi.
Mudofaa vazirligiga ko‘ra, harbiy qism va bo‘linmalarning jangovar shayligi tayyorgarlikdan o‘tkaziladi.
Taktik-saf mashg‘ulotlari davomida bo‘linmalarni jangovar tayyorgarlik signaliga ko‘ra oyoqqa turg‘azish, harbiy texnika kolonnalarining doimiy joylashuv punktlaridan mashg‘ulotlar o‘tkaziladigan hududlarga, poligonlarga va o‘quv markazlariga harakatlanishi ko‘zda tutilgan.
Asosiy maqsad — muvofiqlashtirilgan harakatlarni mashq qilish, shaxsiy tarkibning jangovar tayyorgarlik darajasini oshirish, shuningdek, qo‘mondonlik boshqaruvi ko‘nikmalarini rivojlantirish, deyiladi bayonotda.
Harbiy texnikaning harakatlanishi tasdiqlangan yo‘nalishlar bo‘yicha barcha xavfsizlik choralariga rioya qilgan holda amalga oshiriladi. Mudofaa vazirligi fuqarolardan xotirjamlikni saqlashni, vaqtinchalik noqulayliklarga to‘g‘ri munosabatda bo‘lishni va noto‘g‘ri ma’lumotlarni tarqatishdan tiyilishni so‘raydi.
Izoh (0)