HAMAS garovdagilarni ozod qilish uchun shart qo‘ydi

HAMAS guruhi 10 nafar tirik va 18 nafar vafot etgan garovdagilar jasadini Isroilga topshirish uchun shart qo‘ydi. Bu haqda BBC xabar berdi.

Ma’lum qilinishicha, garovdagilar Isroildagi qamoqxonalarda saqlanayotgan falastinlik mahbuslar evaziga topshirilishi mumkin. Ayirboshlash parametrlari AQSHning otashkesim taklifida mavjud edi. Isroil bunga rozi bo‘lgan.

Ammo HAMAS buni amalga oshirish uchun o‘z pozitsiyasini ilgari surgan. Jumladan, Isroildan o‘t ochishni doimiy to‘xtatish, Isroil qo‘shinlarini G‘azodan to‘liq olib chiqish va gumanitar yordamning uzluksiz oqimini kafolatlash talab etiladi. AQSH tomoni bularning hech birini taklif qilmagandi.

AQSH prezidentining maxsus vakili Stiv Uitkoff shartlarni “mutlaqo qabul qilib bo‘lmaydigan” deb atadi. 

HAMAS biz keyingi haftada darhol boshlashimiz mumkin bo‘lgan bilvosita muzokaralar uchun asos sifatida ilgari surilgan taklifni qabul qilishi lozim. Bu yaqin kunlarda 60 kunlik o‘t ochishni to‘xtatish kelishuvini yakunlashimizning yagona yo‘li.

U tirik garovga olinganlarning yarmini va hayotdan ko‘z yumganlarning yarmini o‘z oilalariga qaytarishga imkon beradi. Shuningdek, bu bilvosita muzokaralarda doimiy o‘t ochishni to‘xtatishga erishish uchun adolatli va mazmunli muhokamalarni boshlashni taqdim etadi, dedi Uitkoff.

Bunga javoban Isroil bosh vaziri Binyamin Netanyahu idorasi o‘z bayonotini e’lon qildi. Unda HAMASning javobi rad etish sifatida talqin qilingan.

Isroil garovga olinganlarni ozod qilish uchun Uitkoffning yangilangan rejasiga rozi bo‘lgan bir paytda, HAMAS o‘z raddiyasida qat’iy turibdi. AQSH prezidentining Yaqin Sharq bo‘yicha maxsus vakili Stiv Uitkoff aytganidek, HAMASning javobi qabul qilib bo‘lmaydi va vaziyatni orqaga suradi. Isroil garovga olinganlarni qaytarish va HAMASni mag‘lub etish bo‘yicha harakatlarini davom ettiradi, deyiladi bayonotda.

HAMAS bunga javoban AQSH taklifini Isroil talqin qilganidek rad etmaganini ma’lum qildi. Guruhning yuqori lavozimli vakili Basem Naimning aytishicha, Isroilning munosabati tomonlarning mavjud kelishuvlariga zid bo‘lgan.

U Uitkoffni adolatsizlik va “to‘liq tarafkashlik“da aybladi. Xususan, Amerika elchisi Isroil tarafdori nuqtai nazaridan gapirayotgani ta’kidlandi.