Andijon viloyati Marhamat tumanida ulkan chinor Cobalt ustiga quladi. Bu haqda viloyat YHXB xabar berdi.
Ma’lum bo‘lishicha, holat 26-may kuni soat 13:20 larda, Marhamat tumani “Dukchi Eshon” MFY Ipak yo‘li ko‘chasida sodir bo‘lgan. 1993-yilda tug‘ilgan I.F. o‘zining Cobalt’ini qatnov qismining chetiga qo‘yib tushlik qilish uchun oshxonaga kirib ketgan vaqtida, ob-havo keskin o‘zgarib, kuchli shamol esishi oqibatida chinor daraxti ushbu avtomashina ustiga qulab tushgan.
Ushbu baxtsiz hodisa oqibatida hech kimga tan jarohati yetkazilmagan, avtomashina texnik shikastlangan.
Toshkentda sodir bo‘lgan kuchli shamol oqibatida daraxt fuqaroni bosib qolgan edi. Hodisa oqibatida fuqaro vafot etgan. Shifokor Murod Qodirovning taʼkidlashicha, shifoxonaga daraxt bosib qolgan ikki nafar bemor olib kelingan.
“Ulardan biri og‘ir ahvolda olib kelingan va shifoxona qabulxonasida vafot etgan. Ikkinchi bemorimizda bosh-miya jarohati mavjud. Uzoq muddatli jarrohlik amaliyoti o‘tkazildi. Hozirda bemorning ahvoli stabil-og‘ir, reanimatsiya bo‘limida davolanmoqda”, deydi shifokor.
Maʼlumot uchun, 23-may, juma kuni tonggida poytaxtda kuchli changli shamol kuzatilgandi. Shuningdek, Toshkent shahrida 17-may kuni tushdan keyin chang bo‘roni kuzatilgan edi.
Izoh (0)