Toshkent shahrining Yashnobod tumanida Gentra avtomobili ustiga daraxt qulab tushgani, jarohat olganlar yo‘qligi, holat bartaraf etilgani xabar qilingandi. Shundan so‘ng nafaqat mulk egasi, ko‘pchilikda avtomobil zararini kim qoplaydi, degan savol tug‘ildi. “Daryo” bunga aniqlik kiritdi.
“O‘zagrosug‘urta” AJ Boshqaruvi Sug‘urta davolari departamenti direktori o‘rinbosari Muzaffar Ibragimovning “Daryo”ga bildirishicha, bu holatda haydovchi o‘z avtomobilini ixtiyoriy sug‘urta qildirgan bo‘lsa, bu uning zararni qoplatishdagi ustunligi hisoblanadi.
Bunday holatda zarar yetgan avtomobilning sug‘urta qilingan holatiga aniqlik kiritish lozim bo‘ladi. Odatda avtomobillar ikki xil holatda: majburiy va ixtiyoriy tarzda sug‘urtalanadi. Agar avtomobil majburiy sug‘urta qilingan bo‘lsa, aniqrog‘i, faqat YPX xodimi talab qiluvchi 40 ming so‘mdan 168 ming so‘mgacha (Toshkent shahri va boshqa hududlar uchun) bo‘lgan miqdordagi sug‘urta polisiga ega bo‘lsa, zararlangan avtomobil egasining mulkiga yetkazilgan zarar qoplanmaydi. Avtomobil ixtiyoriy sug‘urtalangan bo‘lsa, deylik, kreditga olingan avtomobil yoki garovga qo‘yilgan mashina bo‘lsa yoki haydovchi o‘z ixtiyori bilan mulkini sug‘urtalab qo‘ygan bo‘lsa, shartnomada ko‘rsatilgan talabga qarab daraxt bosib qolgan avtomobillarning zarari to‘liq miqdorda yuz foiz to‘lab beriladi, — deydi “O‘zagrosug‘urta” AJ boshqaruvi Sug‘urta da’volari departamenti direktori o‘rinbosari Muzaffar Ibragimov.
Mas’ulning tushuntirishicha, agar sug‘urta kompaniyasi, deylik, 14-mart kuni daraxt bosib qolgan Gentra avtomobili ixtiyoriy sug‘urtalangan bo‘lsa va mashina tiklab bo‘lmaydigan holatga keldi, degan xulosa bo‘lsa, tuzilgan shartnoma bandlariga ko‘ra avtomobil bozor narxining 85 foizidan 100 foizgacha bo‘lgan narxini to‘lab beradi.
“Sug‘urta kompaniyasi va mulkini ixtiyoriy sug‘urtalovchi shaxs o‘rtasida tuzilgan shartnomada barcha shartlar belgilab qo‘yilgan bo‘ladi. Shartnomada majaqlangan avtomobil tiklab bo‘lmaydigan darajaga kelib qolganda va mulk egasi mazkur transport vositasidan voz kechsa, uning zarari sug‘urta kompaniyasi tomonidan to‘liq to‘lab berilishi hamda zarar yetgan mashina sug‘urta kompaniyasi ixtiyoriga o‘tishini nazarda tutgan band sug‘urta shartnomasida ko‘rsatilishi mumkin”, — deydi kompaniya vakili.
Majburiy sug‘urtalangan avtomobilning 40 million so‘mgacha bo‘lgan sug‘urta puli sug‘urtalangan avtomobildan zarar ko‘rgan jabrlanuvchilarga to‘lab beriladi.
“Ustiga daraxt qulab tushishi oqibatida majaqlangan Gentra’da ixtiyoriy sug‘urta bo‘lmay, majburiy sug‘urtagina bo‘lsa, mashinasi zararini sug‘urta kompaniyasi qoplash majburiyatini olmaydi, balki mulk egasining jabrlanuvchiga yetkazgan zararini sug‘urta kompaniyasi orqali to‘lab beradi. Bunda umumiy summa 40 million so‘m bo‘lib, shu pulning 35 foizi, ya’ni 14 million so‘mgacha bo‘lgan qismi jabrlanuvchi tomonning mulkiga yetkazilgan zararni qoplash uchun, qolgan 65 foizi — 26 million so‘mi jabrlangan shaxsning hayoti-sog‘lig‘ini tiklash uchun to‘lab beriladi”, — deydi mutaxassis.
Ekologiya, atrof-muhitni muhofaza qilish va iqlim o‘zgarishi vazirligi bosh mutaxassisi Murod Nurmatovning “Daryo”ga qo‘shimcha qilishicha, jamoat joylaridagi, katta ko‘cha yuzidagi ko‘p yillik daraxtlarning bexosdan qulab tushishining oldini olish maqsadida vazirlik hamda joylardagi Obodonlashtirish boshqarmalari hamkorligida o‘rganishlar olib boriladi.
Obodonlashtirish boshqarmasi xodimlarining kuzatuvlaridan kelib chiqib, xavfli ko‘rinishga ega bo‘lgan, qulab tushish xavfi yuqori bo‘lgan daraxtlar haqida vazirlik va uning joylardagi boshqarmalariga xabar beriladi hamda vaziyat nazoratga olinadi. Biroq haddan tashqari ko‘p yomg‘ir yog‘ib, yerning bo‘shashib qolishi yoki qalin qor yog‘ishi oqibatida daraxtning qulab tushishi bilan bog‘liq holatlarni oldindan bilib bo‘lmaydi. Sog‘lom daraxt ham kuchli shamol yoki ko‘p qor yog‘ishi oqibatida qulab tushishi mumkin. Bunga kafolat yo‘q. Shu sabab ham kuchli shamol kuzatiladigan bo‘lsa, joylardagi hokimliklar haydovchilarni ogohlantirib, avtomobillarini daraxtlar ostida qoldirmaslikni tavsiya qilib boradi, — deydi Murod Nurmatov.
Toshkentda daraxt ostida qolib, majaqlangan avtomobilning aynan qaysi sug‘urta kompaniyasida sug‘urtalangani tahririyatga noma’lum. “O‘zagrosug‘urta” vakillarining savolga javob berishi tahririyatning aynan shu kompaniya vakillarini tanlashi bilan bog‘liq. Avtomobil shu kompaniya tomonidan sug‘urtalangan ekan, degan xulosaga kelish noto‘g‘ri.
Izoh (0)