Hindiston maktablarining birida yuzlab bolalarga o‘lik ilon solingan taom berilgani haqidagi xabarlar tarqaldi. Hozirda sog‘liqni saqlash idoralari holat yuzasidan tekshiruv olib bormoqda. Bu haqda CNN xabar berdi.
Mokama shahrida zaharlangan tushlikni iste’mol qilgan 100 nafar bola kasallikka chalingan. 24-aprel kuni kamida yigirma nafar o‘quvchi kasalxonaga yotqizilgan.
Maktab oshpazi ilon qoldiqlarini ovqatdan olib tashlab, taomlarni tarqatib yuborgan, deb xabar bermoqda mamlakat Inson huquqlari bo‘yicha milliy komissiyasi.
Bolalarning ba’zilarida bosh aylanishi va ko‘ngil aynishi alomatlari kuzatilgan. Bu holat qishloq aholisini g‘azablantirgan va ular mahalliy avtomagistralni to‘sib qo‘ygan.
Xabarlar agar haqiqat bo‘lsa, o‘quvchilarning inson huquqlari buzilishi bo‘yicha jiddiy masala ko‘tariladi, deya qo‘shimcha qildi komissiya.
Hindiston bolalar ta’limini mustahkamlash uchun bepul ovqat ta’minotini yo‘lga qo‘ygan. 2013-yilda ham shunga o‘xshash voqea yuz bergan edi. O‘shanda taom tarkibidagi pestitsidlar kamida 23 nafar o‘quvchini hayotdan olib ketgan. Natijada bu hukumatni xavfsizlik standartlarini yaxshilashga undagan edi.
Izoh (0)