Rossiyalik muxolifatchi Aleksey Navalniyning koloniyada vafot etishiga zaharlanish sabab bo‘lgan. Bu haqda ichki hujjatlar bilan tanishgan The Insider jurnalistlari xabar berdi.
Jurnalistlar Navalniyning “Polyarniy volk” koloniyasida o‘limi bilan bog‘liq yuzlab rasmiy hujjatlarga kirish huquqiga ega bo‘lgan. Ularga ko‘ra, rasmiylar hujjatlardan rasmiy versiyaga to‘g‘ri kelmaydigan alomatlarni ataylab olib tashlagan. Shifokorlarning tasdiqlashicha, bu alomatlar Navalniy zaharlanganidan dalolat beradi.
The Insider’ning ixtiyorida, jumladan, adliya mayori Aleksandr Varapaev tomonidan imzolangan jinoyat ishini qo‘zg‘atishni rad etish to‘g‘risidagi qarorning ikki versiyasi ham bor. Oldingi versiyada Navalniy simptomlari quyidagicha tasvirlangan:
Mahkum Navalniy A.A. 2024-yil 16-fevral kuni №2 kamerali turdagi xonaning sayr maydonida bo‘lganida o‘z salomatligining keskin yomonlashganini his qilib, bu haqda muassasa navbatchi xodimiga xabar bergan. Navbatchi uni sayr maydonidan chiqarib, №4 bo‘limiga olib borgan.
Shundan so‘ng mahkum Navalniy A.A. polga yotib, qorin sohasida keskin og‘riqdan shikoyat qila boshlagan, ko‘ngli aynib, reflektor ravishda qusish boshlagan, tutqanoq xurujlari paydo bo‘lgan va hushidan ketgan. Bu haqda darhol muassasa tibbiyot xodimlariga xabar berilgan.
Ushbu qarorning keyingi, yakuniy versiyasida qorin og‘rig‘i, qusish va tutqanoq haqidagi barcha so‘zlar olib tashlangan.
Ammo The Insider nashrining qo‘lida yana bir hujjat bor — “olingan obyektlar” ro‘yxati, unda “qusish massalari” ham qayd etilgan. Bu namunalar rasmiy ravishda na ekspertiza, na qusish haqida hech qanday xabar berilmagan bo‘lsa ham, ekspertizaga topshirilgan.
Hujjatlar avvalroq Yuliya Navalnayaning “u o‘limidan oldingi so‘nggi daqiqalarda qorin sohasida kuchli og‘riqdan shikoyat qilgan” degan so‘zlarini tasdiqlaydi.
Navalniyni 2020-yilda “Novichok” bilan zaharlanishidan keyin Omsk shifoxonasida davolagan reanimatolog Aleksandr Polupan fikriga ko‘ra, hujjatlarda keltirilgan simptomlar rasmiy versiya bilan mutlaqo mos kelmaydi.
Rasmiy o‘lim sababi — yurak ritmining buzilishi — qarorda keltirilgan simptomlarni, ya’ni qorin sohasidagi keskin og‘riq, qusish va tutqanoqlarni izohlay olmaydi. Bunday simptomlarni zaharlanishdan boshqa narsa bilan tushuntirish juda qiyin. Qorin og‘rig‘i va tutqanoqlar orasidagi qisqa vaqt bu, masalan, fosfororganik birikma bo‘lishi mumkinligidan dalolat beradi (shu turdagi moddalarga “Novichok” ham kiradi, lekin teri orqali emas, balki ichki qo‘llashda).
Polupanning xulosalariga The Insider tomonidan so‘ralgan boshqa turli sohalardagi shifokorlar ham qo‘shiladi.
Zaharlovchi moddadan foydalanilganini tasdiqlovchi boshqa faktlar ham mavjud: hokimiyat uzoq vaqt davomida jasadni bermagan va biomateriallarning muqobil ekspertizasini o‘tkazishga ruxsat berilmagan. Biroq endi zaharlanish holati hujjatlarda rasmiy ravishda tasdiqlandi.
Izoh (0)