Ispaniyaning Salvaterra de Mino shahrida yashovchi 42 yoshli erkak, Pablo Gonsales, restoranda gazli suvdan bir qultum ichganidan so‘ng, uch haftadan beri hech qanday ovqat yoki suyuqlik iste’mol qila olmayapti. Bu haqda Oddity Central xabar berdi.
Pablo Gonsales 12-aprel kuni do‘stlari bilan tapas uslubidagi restoranda ovqatlanganidan so‘ng, mashhur brendga mansub gazli mineral suv, muz va limon bo‘lagini buyurtma berdi. Unga ko‘ra, shisha butilka yopiq holatda bo‘lgan va hech qanday shubhali narsa ko‘rinmagan. Ammo u suvdan ilk qultumni ichganidan keyin og‘zida kuchli kuydiruvchi og‘riqni aniq eslaydi.
U darhol o‘rnidan turib, stakanga qaraganida suyuqlikning sarg‘ish rangda ekanini ko‘rdi. Do‘stining Coca-Cola ichimligidan bir qultum ichib, tezda hojatxonaga yugurib og‘zini chayqadi. U og‘riqdan “ko‘zi qorong‘ilashib” qolganini va do‘stlarining yordamida yurishga majbur bo‘lganini aytmoqda. Boshqa ichimliklar ichilganidan keyin ham ahvoli yaxshilanmagach, tez yordam chaqirildi.
Tez yordam uni Vigo shahridagi Povisa shifoxonasiga olib bordi. Shifokorlar uning ichki a’zolari kuyganini aniqladi va og‘riqni yengillashtirish uchun og‘riq qoldiruvchi vositalar berdi. Mahalliy El Faro de Vigo gazetasi bilan suhbatda Pablo uning qizilo‘ngachi va oshqozoni kuyishdan “qorayib qolganini”, og‘zi esa faqat tezda suv bilan chayilgani tufayli kamroq zarar ko‘rganini aytdi.
Hodisadan keyingi dastlabki 15 kun ichida Pablo hech narsa iste’mol qila olmadi. Oshqozoni asta-sekin tiklanmoqda, biroq shifokorlar qizilo‘ngach hali ham og‘ir shikastlanganini aytmoqda. 28-aprel kuni u ilk bor bir qultum suv ichdi, biroq hali ham butunlay sog‘ayib ketadimi yoki bu qancha vaqt oladi noma’lum.
Kuyishga nima sabab bo‘lganini esa hozircha hech kim aniq bilmaydi. Politsiya kuzatuv kameralarini tekshirgan, ammo hech qanday gumonli holat aniqlanmagan. Mineral suv solingan butilka musodara qilingan va tekshiruvga yuborilgan. Politsiya yetib kelguncha butilka bo‘shatilgan bo‘lsa-da, uning ichida qolgan izlar orqali sabab aniqlanishi mumkin.
Hozircha eng ehtimoliy taxmin butilka yoki stakanning qandaydir kimyoviy tozalovchi vosita bilan tasodifan ifloslangan bo‘lishidir. Biroq restoran egasi bu ehtimolni rad etmoqda.
Izoh (0)