Argentina terma jamoasi JCH—2022 finalida Fransiyani mag‘lubiyatga uchratib (3:3, 4:2), jahon chempioniga aylandi.
Ushbu g‘alabadan keyin dunyoning ko‘plab mashhur shaxslari Twitter orqali Argentina va uning muxlislarini tabrikladi. Quyida ularning ayrimlari keltiriladi:
O‘yinni stadiondan kuzatib borgan Fransiya prezidenti Emmanuel Makron jamoasini qo‘llab-quvvatladi va Argentinani g‘alaba bilan tabrikladi.
“‘Ko‘klar’ bizni orzu qilishga majbur qildi”.
“Fransiya terma jamoasiga bu JCHdagi yorqin yo‘l va kurashuvchanlik rahmat aytaman. Siz butun millat va uning butun dunyodagi tarafdorlarini hayajonga sola oldingiz. Argentinani g‘alaba bilan tabriklayman”, — Makron.
O‘yinni oilasi bilan birga tomosha qilgan Argentina prezidenti Alberto Fernandes ham bu g‘alabaga munosabat bildirdi.
“O‘yinchilar va butun jamoaga rahmat. Ular taslim bo‘lish kerak emasligi, buyuk xalq va buyuk kelajakka ega ekanimizga yorqin misol”, — Argentina prezidenti Alberto Fernandes.
Janubiy va Shimoliy Amerikaning qator davlat rahbarlari va siyosatchilari chempionlarni muborakbod etdi.
“Fransiya uchun og‘ir yo‘qotish, ammo butun dunyo ayovsiz kurash bilan birga chiroyli o‘yin guvohiga aylandi. Taxtga chiqqan Argentina va Messini tabriklayman. 2026-yilda mezbonlarga muxlislik qilishni intiqlik bilan kutaman”, — AQSH davlat kotibi Entoni Blinken.
“Argentina va GOAT’ni (“Buyuk”) Jahon Chempionatidagi ajoyib g‘alaba bilan tabriklayman”, — AQSH sobiq prezidenti Barak Obama.
“Argentinani va prezident Alberto Fernandesni tabriklayman. Mana bu o‘yin”, — Panama prezidenti Laurentino Kortiso.
“Sen ishonasan, sen kurashagan va sen g‘alaba qozonasan. Argentinaning g‘alabasi — bu Patria Grande’ning (ispan tilida so‘zlashadigan Amerika mamlakatlari — izoh “Daryo”) g‘alabasi. Jahon chempionlarini tabriklaymiz”, — Boliviya prezidenti Luis Arse Katakora.
“Argentinani jahon chempionligi bilan tabriklaymiz. Jahon Chempionatidan keyingi tantana butun Argentina va Lotin Amerikasi futbol muxlislariga xursandchilik ulashadi”, — Ekvador prezidenti Gilyermo Lasso.
“Futbol naqadar ajoyib. Argentinalik birodarlarimizni quchib qolamiz. Xursandchiligimizning cheki yo‘q”, — Chili prezidenti Gabriel Borich.
“Qo‘shni Argentinaning g‘alabasidan xursandman. Ko‘p narsaga loyiq Messi va Di Mariya yaxshi o‘yin ko‘rsatdi. O‘yinchilar, murabbiyilar shtabi va do‘stim Alberto Fernandesni tabriklayman”, — Braziliya prezidenti Luis Inasiu Lula da Silva.
“Bu eng yorqin futbol o‘yinlaridan bir sifatida yodda qoladi. Argentinani jahon chempionligi bilan tabriklayman. Ular musobaqani ajoyib o‘tkazdi. Argentina va Messining Hindistondagi millionlab muxlislari bu yorqin g‘alabadan mamnun”, — Hindiston bosh vaziri Narendra Modi.
Shuningdek, qator mashhur shaxslar Argentinaga tabrik yo‘lladi.
“Sahrodagi duel. Bundan ortig‘ini kutish noo‘rin. Argentina va Fransiya o‘rtasidagi aqlbovar qilmas o‘yin” — Tesla va Twitter xo‘jayini Ilon Mask.
Lebron Jeyms o‘z fikrlarini emojilar orqali ifodaladi.
“Men ko‘rgan o‘yinlar ichida eng zo‘ri. Tabriklayman, Argentina!” — Apple bosh direktori Tim Kuk.
“Men tomosha qilgan JCH finallari ichida eng yaxshisi, ularni 1970-yildan beri kuzatib boraman. Argentinalik do‘stlarimga tabrik, munosib g‘alaba!” — grossmeyster Garri Kasparov.
Izoh (0)