Ijtimoiy tarmoqlarda poytaxtdagi mashhur fastfudlarning birida ovqatdan zaharlanish holatlari kuzatilayotgani haqida xabarlar tarqaldi. Sanepidqo‘mita xabarlar yuzasidan ma’lumot berdi.
Qayd etilishicha, ayni kunlarda ovqatlanish korxonasida taom iste’mol qilib, undan zaharlanganlik bo‘yicha boshqarma va uning tuman bo‘limlariga shoshilinch xabarnoma hamda murojaatlar kelib tushmagan. Shu sababli ijtimoiy tarmoqlarda tarqalgan xabarlar hech qanday asosga ega emasligi ta’kidlandi.
Bundan avval Toshkent shahrida bitta kafeda ovqatlangan 23 kishi zaharlanib, shifoxonaga yotqizilgan edi. Bugungi kunga kelib Sanepidqo‘mning Toshkent shahar boshqarmasi tomonidan kafe faoliyati vaqtincha to‘xtatilgan, iste’mol qilingan oziq-ovqat mahsulotlari qoldiqlaridan namunalar olinib, laboratoriya tekshiruvlari davom ettirilmoqda.
Birlamchi epidemiologik surishtiruv natijalariga ko‘ra, zaharlanishga kafeda tayyorlangan sous (bemorlarning barchasi iste’mol qilgan mahsulot) sabab bo‘lgan bo‘lishi mumkin degan xulosaga kelinmoqda.
Ovqatdan zaharlanish holatlaridan jabrlanganlar
O‘zbekistonda 2024-yilning 1-choragida 18 ta ovqatdan zaharlanish holatlari qayd etilgan bo‘lib, bunda 143 nafar fuqarolar jabrlangan.
JSST ma’lumotlariga ko‘ra, dunyoda har yili xavfli oziq-ovqat mahsulotlarini iste’mol qilish natijasida 600 millionga yaqin inson jabrlanadi. 420 ming kishi mikroorganizmlar yoki kimyoviy moddalar bilan ifloslangan oziq-ovqatlarni iste’mol qilish natijasida vafot etadi. Ularning 125 ming nafarini 5 yoshgacha bo‘lgan bolalar tashkil etadi.
Oziq-ovqat xavfsizligi ishlab chiqarishdan tortib, yig‘ib olish, qayta ishlash, saqlash, tarqatish, tayyorlash hamda iste’mol qilishgacha bo‘lgan barcha bosqichlarda muhim rol o‘ynaydi. Ishlab chiqarish zanjirining barcha bosqichida oziq-ovqat mahsulotlarining ifloslanishi yoki zararlanishi xavfi mavjud bo‘lib, ularning xavfsizligi uchun har bir ishtirokchi – tadbirkor javobgar.
Izoh (0)