Intuitive Machines kompaniyasi qurilmasining qo‘nishi ishga tushirilgandan bir hafta o‘tgach sodir bo‘ldi. Bu Apollon dasturi tugatilganidan keyin AQSHning Oyga ilk qo‘nishidir. Bu haqda DW xabar berdi.
Texasning Intuitive Machines kompaniyasi vakili Nova-C moduli 22-fevral, payshanba kuni Yer sun’iy yo‘ldoshi yuzasiga yetib kelib, u yerdan signal uzatganini ma’lum qilgan. Bu 50 yil oldingi Apollon dasturidan keyin AQSHning Oyga birinchi qo‘nishi. Shu paytgacha faqat AQSH, SSSR, Xitoy, Hindiston va Yaponiyaning davlatga qarashli kosmik kompaniyalari Oyga muvaffaqiyatli qo‘ngan. Xususiy kompaniyalar hech qachon bunday tashabbusni amalga oshira olmagan.
Odissey nomini olgan Nova-C moduli Oyda 14 kun ishlashi kutilmoqda. Qurilma Ilon Maskning SpaceX Falcon-9 raketasi yordamida Florida shtatidagi Jon Kennedi kosmik markazidan uchirilgan. Parvoz dastlab 14-fevral kuni ertalab rejalashtirilgan, biroq texnik nosozlik tufayli u bir kunga qoldirilgan edi.
Modulda foydali yuk sifatida oltita NASA tadqiqot asboblari mavjud. Ular qo‘nish zonasidagi muhitni o‘rganishi kerak bo‘ladi. Bu NASAning joriy yil boshidan beri Oyga qo‘nuvchi modulni yuborishga ikkinchi urinishidir. Yanvar oyida Astrobotic Technology kompaniyasining xuddi shunday missiyasi muvaffaqiyatsiz yakunlangan.
Izoh (0)