Boysunda 1-sentyabr kuni “Mustaqillikning 25-yilligi” koniga qarashli quduqda burg‘ilash ishlari vaqtida texnologik jarayonning buzilishi oqibatida oltingugurt gazi chiqishi kuzatilgan edi. Oradan 10 kun o‘tgan bo‘lsa-da, gazning chiqishi to‘xtagani yo‘q va bundan aholi, keng jamoatchilik norozi bo‘lmoqda. Mas’ullar vaziyat qandayligi xususida aniq ma’lumotlar berishgani yo‘q.
Bugun, 11-sentyabr kuni AOKAda bo‘lib o‘tgan matbuot anjumanida FVV matbuot xizmati rahbari o‘rinbosari Samandar Hikmatullayev mazkur holat yuzasidan izoh berdi. Uning aytishicha, hududda hukumat komissiyasi ish olib bormoqda va holat yaqin kunlarda bartaraf qilinadi.
Gazning tabiatga chiqarayotgan zararini kamaytirish maqsadida sizib chiqqan gaz yondirib qo‘yilgan. Bu tajriba butun dunyoda bor. Shamol qaysi tomonga essa gaz o‘sha tomonga qarab esib boradi. Bu yer tog‘oldi hudud bo‘lgani bois turli tomonlardan shamol esadi.
O‘sha hududdagi bir nechta qishloq aholisi evakuatsiya qilingan. Lekin aholi yashash joyiga qaytib kelish holatlari kuzatilmoqda. Ommaviy zaharlanishlar yo‘q. To‘g‘ri, mol-hollarini, uy-joylarini ko‘rish uchun kelgan fuqarolarda ayrim hollarda zaharlanish hollari bor. Bu yengil zaharlanish. Shifokorga murojaat qilganidan so‘ng qisqa vaqt ichida bular kerakli yordamni olib, shifoxonadan chiqqan holatlar bor. Ular o‘z ishlarini davom ettirmoqda, dedi Samandar Hikmatullayev.
FVV mas’ulining qo‘shimcha qilishicha, yaqin kunlarda bu konni jilovlash ishlari olib boriladi, ammo muddati aniq emas.
Nima bo‘lgan edi?
1-sentyabr kuni soat 15:17 da Surxondaryo viloyati Boysun tumani “Ko‘lqamish” MFY hududida joylashgan “Mustaqillikning 25 yilligi” koniga qarashli 604-son qudug‘ida burg‘ilash ishlari olib borish vaqtida texnologik jarayonning buzilishi oqibatida oltingugurt (vodorod sulfid) gazi chiqishi kuzatilgan.
Aholi xavfsizligini ta’minlash maqsadida kon yaqinida yashovchi fuqarolar xavfsiz hududga evakuatsiya qilingan. Fuqarolarning tan jarohati olish va halok bo‘lish holatlari qayd etilmagan.
Prezidentning shaxsan topshirig‘iga asosan, Bosh vazir o‘rinbosari Ochilboy Ramatov, Favqulodda vaziyatlar vaziri general mayor Abdulla Qo‘ldoshev, Energetika vaziri Jo‘rabek Mirzamahmudov, Surxondaryo viloyati hokimi Ulug‘bek Qosimov hamda “O‘zbekneftgaz” boshqaruv raisi Bahodir Siddiqov hodisa joyiga yetib borgan.
Energetika vaziri tomonidan tarqatilgan ma’lumotda aytilishicha, bu yerda barcha tegishli vazirlik va tashkilotlarni jalb etgan holda, Tezkor shtab tashkil qilingani texnogen ofat asoratlarini bartaraf etish bo‘yicha zarur choralar ko‘rilmoqda.
Izoh (0)