Omsk shahrining Kirov tuman sudi Rossiya Federatsiyasi prezidenti Vladimir Putinni Adolf Gitlerga o‘xshatuvchi suratlar, shuningdek, uning tasviri tushirilgan boshqa memlar joylashtirilgan saytlardagi 12 ta sahifani Rossiyada taqiqlangan deb e’lon qildi. Bu haqda “Vyorstka” nashri xabar bermoqda.
“Ba’zi hollarda Putinning mo‘ylovi va soch turmagi Gitlernikiga o‘xshash qilib tahrirlangan suratlar taqiq ostiga tushgan. Xususan, o‘sha sahifalarda e’lon qilingan Pavel Derevyanko ishtirokidagi “Gitler kaput!” filmidan olingan tasvirlar ham taqiqlandi”, deyiladi nashr xabarida.
Shuningdek, “Putler kaput” yozuvlari tushirilgan suratlar ham taqiqlangan. Ularning aksariyati norozilik namoyishlari plakatlarida aks etgan. Shuningdek, Ilya Varlamovning blogidagi “Putler, qo‘rg‘oshin bilan mehmon qilishlaridan oldin zahar ich” degan yozuvli plakat ushlab turgan ayol tasviri ham taqiqqa tushgan.
Bundan tashqari, sud Stixi.ru saytida Putinning boshiga to‘pponcha tiralgan surati va “Rossiyani sharmandalikdan qanday qutqarish mumkin” degan yozuv joylashtirilgan sahifa, shuningdek, “Jonli jurnal”dagi “Timsoh” hajviy jurnali muqovasiga o‘xshatib ishlangan, Putinning surati tushirilgan va “Sudda ishni mazmunan ko‘rib chiqish boshlandi. Maxluq o‘zining aybsiz ekanini aytdi” degan yozuvli tasvir ham taqiqlangan.
Sud Fishki.net portalining Moskvadagi norozilik namoyishlaridan olingan fotosuratlar to‘plami sahifasini ham taqiqlagan. Prokuratura da’vosiga ko‘ra, bunga “Putinning Ukrainaga qarshi tajovuzi Rossiya va Yevropaga qarshi yo‘naltirilgan” degan yozuvli plakatni ko‘tarib turgan erkak tasvirlangan surat sabab sifatida ko‘rsatilgan.
Tasvirlarni taqiqlashni Omsk prokuraturasi xodimlari talab qilgan. Ularning fikricha, bu tasvirlar “jamiyat va davlat manfaatlariga salbiy ta’sir ko‘rsatadi” va “terrorchilik faoliyatini amalga oshirishga undaydi”.
Izoh (0)