Madridning “Real” klubi “Inter” yarim himoyachisi Nikolo Barellani o‘z safiga qo‘shib olishni rejalashtirmoqda. Todofichajes nashrining yozishicha, “qaymoqranglilar” prezidenti Florentino Peres italiyalik futbolchini jamoasiga olib kelishni istamoqda.
Manbaga ko‘ra, “Real” 28 yoshli Barellani jamoani tark etgan Luka Modrich o‘rniga asosiy nomzod sifatida ko‘rmoqda.
“Inter” rahbariyati uni qo‘yib yuborishga tayyor, biroq futbolchini 80–100 million yevro atrofidagi summaga transfer qilishni maqsad qilgan. Chunki ular Barellaga “Manchester Siti” va “Liverpul” klublari ham qiziqish bildirayotganidan xabardor, shu bois bu transferdan yaxshi daromad olishni rejalashtirgan. Biroq “Real” bu narxga rozi emas – madridliklar iloji boricha Barellani arzonroq narxda qo‘lga kiritishni xohlamoqda.
Ma’lumot uchun, Nikolo Barella o‘tgan A Seriya mavsumida 33 o‘yinda maydonga tushib, 3 ta gol va 6 ta golli uzatma bergan. Uning “Inter” bilan shartnomasi 2029-yil iyunigacha amal qiladi. Transfermarkt portali futbolchining qiymatini 80 million yevroga baholagan.
Izoh (0)