O‘zbekistonda 1-iyundan boshlab yo‘l harakati qoidalarini buzganlik uchun jarima ballari tizimi joriy etildi. Ichki ishlar vazirligi Jamoat xavfsizligi departamenti Yo‘l harakati xavfsizligi xizmatining matbuot kotibi Zoir Yo‘ldoshev “Sputnik” nashriga bergan intervyusida tizim nima uchun amaliyotga tatbiq etilayotganini ma’lum qildi.
Uning so‘zlariga ko‘ra, yangi tizim mamlakatdagi yo‘l harakati xavfsizligini kuchaytirishi va haydovchilarning mas’uliyatini oshirishi ko‘zda tutilgan. Jarima ballari tizimi — bu jazo choralari bilan birga qo‘llaniladigan ballar bo‘lib, ular O‘zbekiston Ma’muriy javobgarlik kodeksining 12-moddasiga asoslanib qo‘shiladi. Ushbu tizim O‘zbekistonda Fransiya, Rossiya, Xitoy, Ozarbayjon va Qozog‘iston kabi davlatlarning tajribasiga asoslanib joriy etilmoqda.
O‘zbekistonning ma’muriy kodeksiga kiritilgan jarima ballari tizimi jiddiy yo‘l harakati qoidabuzarliklarini 12 ta maxsus modda asosida hisoblab boradi. Qo‘pol qoidabuzarliklarni doimiy ravishda sodir etib kelayotganlar uchun yo‘l-patrul xizmati xodimlari tuzgan bayonnomalar asosida hisoblanadi. Har bir qoidabuzarlik uchun ballar 0,2 dan 2 ballgacha haydovchining hisobiga yoziladi.
Yiliga 10 marta qizil chiroqdan o‘tgan haydovchini potensial qotil deb hisoblash mumkin. Ular yo harakat qoidalarini bilmay buzadi, yo ataylab e’tibor bermaydi. Yangi tizim qoidabuzarlarga kuchliroq jazo berish orqali ularni to‘xtatishga qaratilgan. Agar haydovchi yil davomida qayta-qayta qoidalarni buzsa, har bir qoidabuzarlik uchun unga ballar hisoblanadi. Haydovchi yil davomida jami 12 ball to‘plasa, sud qarori bilan kamida 6 oy muddatga haydovchilik guvohnomasidan mahrum qilinadi, deydi YHXX vakili.
Izoh (0)