Rossiya Xavfsizlik kengashi raisi o‘rinbosari Dmitriy Medvedev Ukraina hududining katta qismini o‘z ichiga olgan bufer zona aks ettirilgan xaritani ko‘rsatdi.
Medvedev agar Ukraina harbiy yordam olishda davom etsa, bufer zona yaratilishi bilan tahdid qildi. Xarita aks etgan videoda qizil rang bilan belgilangan bufer zonasi Ukrainaning katta qismini egallagan, g‘arbdagi kichik hudud esa bundan mustasno. Ukraina hududi ko'k rang bilan, Rossiya hududi esa yashil rang bilan belgilangan.
Rossiya hukumati Ukraina bilan chegaradosh hududlarda bufer zonalarini tashkil etish muhimligini bir necha bor ta‘kidlagan. Prezident Vladimir Putin chegarada “sanitariya zonasi” yaratish niyati haqida ilk bor 2023-yilning iyun oyida maʼlum qilgan.
2024-yilning may oyida u Xarkov viloyatida “sanitariya zonasi” tashkil etish niyatida ekanini aytgandi. Putinning da‘volariga ko‘ra, Rossiyaning chegaradosh hududlarini o‘qqa tutishdan himoya qilish zarur.
Putin 2025-yil mart oyida Kursk viloyatidagi qo‘shinlarni boshqarish punktiga tashrif buyurib, Rossiya chegarasi bo‘ylab “xavfsizlik zonasi” yaratish masalasini ko‘rib chiqishni taklif qilgandi. 2025-yil may oyi oxirida prezident rossiyalik harbiylar Belgorod, Bryansk va Kursk viloyatlarini himoya qilish uchun “zarur bufer zona” yaratish ustida ishlayotganini aytgandi.
BBC nashrining Ukraina Bosh shtabidagi manbasiga ko‘ra, Rossiya hukumati Sumi viloyatida bufer zonasi o‘rnatishi mumkin. May oyi boshida Rossiya chegarasiga yaqin joylashgan Belopolye va Vorojba shaharlaridan shoshilinch evakuatsiya e’lon qilingan. Hozirga qadar evakuatsiya hududiga 200 dan ortiq aholi punkti kiritilgan.
Rossiya Ukrainaga uchinchi mamlakatlarning harbiy yordam berishiga qarshi chiqmoqda. Moskvaning ta’kidlashicha, Kiyevni qo‘llab-quvvatlash mojaroning muddatini cho‘zadi, xolos, ammo belgilangan maqsadlarga erishishiga to‘sqinlik qila olmaydi.
Izoh (0)