Shimoliy Koreya yetakchisi Kim Chen In shu hafta artilleriya mashg‘ulotlarida qatnashdi va Markaziy harbiy komissiya yig‘ilishini o‘tkazdi. Bu haqda North Korea News xabar berdi.
Koreya Markaziy Axborot Agentligi (KCNA) ma’lum qilishicha, Kim Chen In va o‘nlab rasmiylar 28-may kuni sakkizinchi Markaziy Harbiy komissiya yig‘ilishida ishtirok etgan. Unda barcha sohalarda strategik va taktik ustunlikni mustahkamlab turish uchun harbiy choralar belgilab olingan.
Yig‘ilishda siyosiy va harbiy ahamiyatga ega yirik qurilish loyihalari muhokama qilingan, milliy mudofaa bo‘yicha yangi loyihalar tasdiqlangan.
Shuningdek, rasmiylar mudofaa imkoniyatlarini kuchaytirishga oid muhim qarorlar qabul qilgan. Bular qatorida shaxsiy tarkib ustidan qat’iy nazorat o‘rnatish, yangi boshqaruv tizimini va “po‘latdek intizom tizimi”ni joriy etish ham bor.
-I_dxN72w.avif)
Yig‘ilishda turli qurollarni sinash va mashg‘ulotlar o‘tkazish rejalari muhokama qilingan. Chunki Kimning 5 yillik harbiy rejasi tugash arafasida va yangi reja dekabr yoki yanvarda bo‘ladigan partiya yig‘ilishida e’lon qilinishi aytilmoqda. Yig‘ilishda Kim Chen In 6 ta harbiy korpus boshlig‘i, artilleriya va xavfsizlik bo‘limlari rahbarlarini almashtirgan. Ularning kimligi yoki qaysi korpusdan ekani ochiqlanmagan.
Suratlarda harbiy bo‘linmalar dengiz bo‘yidagi noma’lum joydan eski uslubdagi to‘ldiriladigan dala to‘plari bilan dengizga qarata o‘q uzayotgani ko‘rsatilgan. Bu mashg‘ulotlarda bo‘linma qo‘mondonlari ham qatnashgan.
“Kim artilleriya kuchlarining haqiqiy jangovar qobiliyatlari mukammal ekanini maqtagan va artilleriya kuchlarini yanada kuchaytirish bo‘yicha ko‘rsatmalar bergan”, deb xabar berdi KCNA.
Kim 2024-yil oktyabr oyida Shimoliy Koreyaning 10 mingdan ortiq qo‘shinini Rossiyaga joylashtirishni boshlagan. Ma’lumotlarga ko‘ra, askarlar asosan Rossiya hududida Kursk viloyati hududini Ukraina qo‘shinlaridan qaytarib olishga jalb qilingan. Ikki davlat 2025-yil aprel oyining oxiriga qadar bu harakatni tan olmagan.
Izoh (0)