Eron 24-may kuni mamlakatdagi birinchi havo taksisini rasman ishga tushirdi. Bu haqda IRNA agentligi xabar berdi.
Ma’lum qilinishicha, havo taksisining birinchi reysi Keroj va Qazvin shaharlarini bog‘lab, muntazam qatnovlarning boshlanishi bo‘lgan.
“Havo taksisining ishga tushirilishi katta istiqbollarni va’da qiluvchi muhim yutuqdir”, deydi Eron Aloqa va axborot texnologiyalari vazirligi huzuridagi Maxsus iqtisodiy zona (MIZ) va Payam xalqaro aeroporti bosh direktori Muhsin Hasanlu.
Hasanluning so‘zlariga ko‘ra, yangi transport turi Payam EIZga yangi investitsiyalarni jalb qilish, milliy iqtisodiyotni rag‘batlantirish va Alborz viloyatini rivojlantirishga yordam beradi. Bundan tashqari, aholining aviatsiya xizmatlaridan keng foydalanishi uchun qulay sharoitlar yaratiladi.
“Havo taksisining joriy etilishi kam yuklangan havo yo‘nalishlarini jonlantirishda muhim rol o‘ynaydi”, deydi Hasanlu.
Eronda birinchi havo taksisining ishga tushirilishi mamlakat transport infratuzilmasini modernizatsiya qilish va aviatsiya xizmatlaridan foydalanish imkoniyatlarini kengaytirishda muhim qadam sifatida baholanmoqda.
Xitoyning EHang startapi besh yildan so‘ng Xitoy osmonida “parvoz qiluvchi yo‘nalishli taksilar” harakatlanishiga, infratuzilma mavjud bo‘lgan ayrim shaharlarda esa ular individual yo‘nalishlarda ham ishlashiga ishonch bildirgandi.
Izoh (0)