Kilian Mbappe 2024/25-yilgi mavsum “Oltin butsa”siga sazovor bo‘ldi. “Real Madrid” hujumchisi Ispaniya chempionatidagi ilk mavsumidanoq 31 ta gol urib, Yevropaning eng sermahsul futbolchisi sifatida tan olindi.
Garchi “Sporting” klubi hujumchisi Viktor Dyokeresh mavsum davomida 39 ta gol urgan bo‘lsa-da, Portugaliya chempionatining saviyasi Ispaniya La Ligasidan pastroq ekani sababli, u reytingda Kilian Mbappedan keyingi o‘rinni egalladi. Taqqoslash uchun, La Ligada har bir gol uchun 2 ball koeffitsient hisoblanadi, Portugaliya Premeyrasida esa har bir gol uchun 1,5 ball bilan baholanadi.
Shuningdek, Mbappe bir qancha natijalarni ham yangiladi. Xususan, u 2004/05-yilgi mavsumdan buyon “Oltin butsa”ni qo‘lga kiritgan ilk fransuz futbolchisi bo‘ldi. Oxirgi marta Tyerre Anri mazkur sovringa ega chiqqan edi. Shuningdek, Kilian so‘nggi 10 yil ichida ushbu mukofotni qo‘lga kiritgan ilk “Real” futbolchisiga aylandi. 2014/15-yilgi mavsumda Krishtianu Ronaldu “Oltin butsa”ga ega chiqqan va shundan keyin madridliklarning hech qaysi a’zosi ushbu mukofotni qo‘lga kiritmagan edi.
2024/25-yilgi mavsum “Oltin butsa” sovrini reytingi:
1. Kilian Mbappe (“Real”) – 31 gol × 2 = 62 ochko
2. Viktor Dyokeresh (“Sporting”) – 39 gol × 1,5 = 58,5 ochko
3. Muhammad Saloh (“Liverpul”) – 29 gol × 2 = 58 ochko
4. Robert Levandovski (“Barselona”) – 27 gol × 2 = 54 ochko
5. Harri Keyn (“Bavariya”) – 26 gol × 2 = 52 ochko.
Izoh (0)