Toshkentdan Moskvaga parvozni amalga oshirayotgan SU1871 reysi 28-may kuni dronlarning hujumi tufayli Qozonga qo‘ndi. Yo‘lovchilar 4 soat davomida ularni samolyotdan chiqarishmaganini aytmoqda. Bu haqda yo‘lovchilar murojaatiga tayanib, “Ostorojno Novosti” Telegram kanali xabar berdi.
Ma’lumotlarga ko‘ra, Moskvadagi aeroportlar yopilgani sababli tungi soat 03:00 da Toshkentdan havoga ko‘tarilgan samolyot Qozonga yo‘naltirilgan. Soat 04:55 dan beri yo‘lovchilar samolyotda qolmoqda, ularga na Moskvaga parvoz haqida ma’lumot berilgan, na samolyotdan chiqishga ruxsat etilgan.
Gazaklar berilmadi, parvoz haqida ma’lumot berishmayapti! Vaholanki, havo hududi allaqachon ochilgan. Ikki soat oldin bizni Qozonda samolyotdan tushirishmoqchi ekani haqida ma’lumot bor edi, keyin yana (“Aeroflot”) kompaniyaning qarorini kutayotganimizni aytishdi, deydi yo‘lovchilar.
Shundan so‘ng yo‘lovchilarga yaqin 12 soat ichida parvoz rejalashtirilmagani, “ekipajning ish smenasi tugagani va Qozon aeroporti samolyotlarni qabul qilmayotgani” haqida xabar berilgan. “Aeroflot” aviakompaniyasi xodimlariga ko‘ra, aeroport haddan ortiq yuklangan va qo‘nishga ruxsat bermayapti.
Moskva aeroportlari dronlar hujumi sababli samolyotlarni qabul qilmayapti.
28-may kuni tun bo‘yi va ertalabgacha davom etgan dronlar hujumi sababli Moskva aeroportlarida yuzlab reyslar kechiktirilgan. Vnukovoda yarim tundan boshlab 64 ta uchish va 74 ta qo‘nish reysi kechikkan.
Vnukovoga yo‘l olgan samolyotlarning bir qismi keyinchalik ish faoliyatini cheklagan Sheremetyevoga, ayrimlari esa Sankt Peterburgning Pulkovo aeroportiga yo‘naltirilgan. So‘nggi aeroport zaxira maydon sifatida bir kechada 14 ta reysni qabul qilgan.
Domodedovoda 30 ga yaqin uchish, shuningdek, 39 ta qo‘nish reysi, Sheremetyevoda 60 dan ortiq uchish va 23 ta qo‘nish reysi, Jukovskiyda ikkita uchish va oltita qo‘nish reysi kechiktirilgan yoki bekor qilingan. “Rosaviatsiya” xabar berishicha, poytaxt aeroportlaridagi cheklovlar Toshkent vaqti bilan soat 9:15 da bekor qilingan.
Izoh (0)