Sudanda hukumat dushmani hisoblangan “Tezkor yordam kuchlari” dron hujumlarini kuchaytirdi. Bu haqda BBC xabar berdi.
Mamlakat armiyasi poytaxt Xartumni qaytarib olganidan bir necha hafta o‘tgach, “Tezkor yordam kuchlari” (TYK) Port-Sudanga va poytaxtga misli ko‘rilmagan dron zarbalari bera boshlagan. Uch yildan buyon davom etayotgan mojaroda dronlarning roli tobora ortib bormoqda.
Poytaxtdagi hujumlar elektr ta’minotidagi uzilishlarga sabab bo‘lgan. Shahar aholisi suv tanqisligiga duchor bo‘lgan. So‘nggi oylarda harbiylashtirilgan kuchlar to‘g‘onlar va elektr stansiyalari va mamlakatdagi yagona aeroport kabi muhim fuqarolik infratuzilmasiga dron hujumlarini kuchaytirgan.
Aftidan, TYK armiyaning ta’minot liniyalarini buzishga urinmoqda. Xartumdagi dron hujumlari va gumanitar xabga qilingan tajovuzlar TYKning qat’iyligi va katta hududiy yo‘qotishlarga qaramay, jangni davom ettirishga qodir ekanligidan dalolat beradi,” deb yozgan BBC.
Urush Sudan Qurolli Kuchlari va TYK o‘rtasida hokimiyat uchun kurash sifatida boshlangan. Keyinchalik boshqa Sudan qurolli guruhlari va xorijliklar ham urushga aralashgan. BMT buni “dunyodagi eng yomon gumanitar inqiroz” deb atagan.
“TYK ta’sir ko‘rsata olish uchun Port-Sudanga quruqlik orqali borish shart emasligini ko‘rsatishga harakat qilmoqda”, dedi sudanlik siyosatshunos Xolod Xayr.
“Xartumni qaytarib olishingiz mumkin, lekin uni hech qachon boshqara olmaysiz. Port-Sudanga ega bo‘lishingiz mumkin, lekin uni ham boshqara olmaysiz. Chunki biz boshqarib bo‘lmaydigan xavfsizlik inqirozi keltirib chiqardik. Biz tugadi demagunimizcha urush tugamaydi,” degan TYK.
Ba’zi ekspertlar TYKning Port-Sudanni bombardimon qilishini qasos sifatida ko‘rmoqda.
Sudan armiyasi Birlashgan Arab Amirliklarini TYKni dronlar bilan ta’minlashda ayblagan. Oqibatda Abu Dabi bilan diplomatik aloqalar uzilgan. BAA esa ayblovlarni qat’iyan rad etgan.
Izoh (0)