АҚШ президенти Дональд Трамп маъмурияти Украинадаги урушни икки хил босқичда тугатмоқчи. Бу ҳақда давлат котиби Марко Рубио CBS News телеканалига берган интервьюсида маълум қилди.
Маълумотларга кўра, Украина ўз ҳудудларидан воз кечиши эвазига хавфсизлик кафолатларини олиши мумкин бўлади.
А режа — ўт очишни тўхтатиш, шундан сўнг Б режага, яъни урушни узоқ муддатга тўхтатиш бўйича музокараларнинг иккинчи босқичига ўтишимиз мумкин, деди Рубио.
У гап бевосита мулоқот эмас, балки “воситачилик дипломатияси” ҳақида кетиши мумкинлигини айтди. Ушбу босқичнинг мақсади барқарор ва барча томонларнинг эҳтиёжларини ҳисобга оладиган ечимни топишдир.
Рубионинг сўзларига кўра, музокараларнинг иккинчи босқичи жуда мураккаб бўлади, бироқ биринчи босқичсиз бу амалга ошиши имконсиз.
Томонлар бир-бирини ўққа тутишда давом этаётган бўлса, узоқ муддатли тинчлик ҳақида келишиб олиш қийин. Шунинг учун президент (Дональд Трамп) ўт очишни тўхтатишга эришишга интилмоқда. Агар биз бунга эришсак, иккинчи босқичга — узоқ муддатли ечимни ишлаб чиқишга ўтамиз. Бу мураккаб бўлади, иккала томондан ҳам кўп меҳнат ва муроса талаб этади, лекин бу зарур. Уруш абадий давом этиши мумкин эмас, дея таъкидлади Рубио.
Шунингдек, у уч йилдан бери давом этаётган урушнинг ниҳоятда мураккаб эканини ва осон ечим йўқлигини айтди.
Марко Рубио, шунингдек, махсус вакил Стив Уиткоффнинг Россия президенти Владимир Путин билан яқинда бўлиб ўтган учрашувига изоҳ берди. Унинг сўзларига кўра, учрашув “истиқболли ва умидли” бўлган. Аммо у бу ҳақда очиқ муҳокама қилмаслигини ҳам айтиб ўтди.
Изоҳ (0)