Агар Украинадаги уруш музлатилса, Россияга ўзини тиклаб олиши ва қўшинларини НАТО билан тўғридан-тўғри тўқнашувга тайёрлаши учун олти йилдан ўн йилгача вақт керак бўлади. Бу ҳақда “Германия ташқи сиёсат жамияти” (ДГAP) таҳлил маркази хабар берди.
Марказ томонидан олиб борилган тадқиқот немис ҳарбий ва разведка манбаларидан олинган маълумотларга асосланган.
“Украинадаги деярли икки йиллик урушдан кейин ҳам Россиянинг ҳарбий салоҳияти ҳозирги кўринишидан юқори. Одамлар ва техниканинг энг катта йўқотишларини қуруқликдаги қўшинлар кўрган”, — дейди таҳлилчилар.
Мутахассисларнинг таъкидлашича, Москва тезда ҳарбий салоҳиятини оширади, шунинг учун НАТОга ҳам ўз имкониятларини ошириш ва тўғридан-тўғри ёки билвосита конфликтнинг олдини олиш учун 5-9 йил бор. Россия, эҳтимол, Болтиқбўйи мамлакатларига тажовуз қилади, дейди немис таҳлилчилари.
“Масалан, Болтиқбўйида ҳужум муваффақиятли бўлиши мумкин деган таассурот пайдо бўлганида, Россиянинг эҳтимолий ҳужуми учун ойна очилади. Россия ўз армиясини қайта тиклаш учун керак бўлган вақт НАТОнинг ҳарбий кучини ошириш суръатини белгилаб бериши керак. Блок Россия ҳужумини камида ўн йил ичида қайтара олиши керак, яхшиси олти йил ичида”, — дейилади тадқиқотда.
Маълумот ўрнида, Украина президенти Владимир Зеленский бир неча бор ҳукумат урушни музлатиш сценарийсига рози бўлмаслигини, чунки бу келажакда янги урушга олиб келишини таъкидлаган.
Изоҳ (0)