Самарқанд вилоятининг Булунғур туманида 5 кг марихуана гиёҳвандлик воситасини 10 минг долларга сотаётган шахс қўлга олинди. Бу ҳақда ИИВ Тезкор қидирув департаменти хабар берди.
Маълум қилинишича, 1981 йилда Булунғур туманида туғилган шахс махсус харидорга 1 кг марихуанани 25 млн сўмдан сотишни режалаштиргани тўғрисида маълумотлар олинган.
Махсус харидор билан боғланган шахс 5 кг юкни тайёрлаб қўйганини маълум қилган.
Ўтказилган тезкор тадбирда вазни тахминан 5 кг марихуанани 10 минг долларга сотаётган шахс далилий ашёлар билан қўлга олинди.
Ҳолат юзасидан Жиноят кодексининг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилиб тергов ҳаракатлари олиб борилмоқда.
Гиёҳванд моддалар савдоси
2024 йилнинг март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)