ДХХ Россия ва Қозоғистондан олиб келинган салкам 20 кило синтетик наркотик моддаларни мусодара қилди (видео)

Давлат хавфсизлик хизмати Россия ва Қозоғистондан олиб келинган 19,7 килограмм синтетик наркотик моддаларни мусодара қилди.

Қайд этилишича, ДХХнинг Тошкент шаҳар бўйича бошқармаси ходимлари томонидан ички ишлар органлари билан ҳамкорликда Тошкент шаҳри ва Тошкент вилояти ҳудудида бир нечта тезкор тадбир ўтказилган.

Жумладан, Тошкент вилоятининг Қибрай туманида яшовчи фуқаронинг яшаш хонадони кўздан кечирилганда, сотиш учун тайёрлаб қўйилган 4 килограмм 824 грамм “Мефедрон”, 3 килограмм  274 грамм “Спайс” ва 2 килограмм 130 гамм “Алфа-ПВП” синтетик гиёҳвандлик воситалари борлиги маълум бўлиб, улар тегишли тартибда расмийлаштириб олинган.

Аниқланишича, ушбу наркотик моддалар Ўзбекистонга божхона назоратини четлаб ўтган ҳолда Қозоғистондан олиб келинган ва келгусида уларни кичик бўлакларга бўлган ҳолда, интернет тармоғи орқали сотиш режалаштирилган.

Бошқа ҳолатда эса уч дона автомобиль эҳтиёт қисми (“кардан вали”) ичига яширилиб, Россиядан юк автомашинасида юборилган 3 килограмм 780 грамм “Мефедрон” синтетик гиёҳвандлик воситасини Тошкент вилоятининг Зангиота туманида қабул қилиб олган вақтида, Тошкент шаҳрида яшовчи икки нафар ва Тошкент вилоятида истиқомат қилувчи бир нафар шахс ашёвий далиллар билан ушланган.

Маълум бўлишича, ушбу наркотик моддалар ҳам кичик бўлакларга бўлинган ҳолда, интернет тармоғи орқали мижозларга сотилиши режалаштирилган.

Сирдарё вилоятида туғилган фуқаронинг Тошкент шаҳар Янгиҳаёт туманидаги вақтинча яшаш хонадони кўздан кечирилганда эса 5 килограмм 687 грамм “Прегабалин” кучли таъсир қилувчи моддаси борлиги маълум бўлган.

Мазкур шахс Россиядан келтирилган ушбу кучли таъсир қилувчи моддаларни кичик бўлакларда Янгиҳаёт ва Сергели туманлари ҳудудидаги хуфия жойларга яшириб, сўнгра уларни Telegram мессенжери орқали мижозларга сотишни режа қилган.

Ҳозирда мазкур шахсларга нисбатан жиноят ишлари қўзғатилиб, қамоқ эҳтиёт чораси қўлланган.

Аввалроқ Фарғонада 17 ёшли бола яшаётган уйдан 30 килодан ортиқ наркотик моддалар топилгани тўғрисида хабар берилганди. Шунингдек, Самарқандда фуқаронинг уйидан салкам 32 кило марихуана топилган, ДХХ томонидан Тожикистон ва Қирғизистондан олиб келинган наркотик моддалар тўхтатиб қолинган эди.