Тошкент шаҳар жиноят ишлари бўйича Яккасарой туман судида “закладчик”ларни калтаклаган 14 нафар шахсга нисбатан суд ҳукми ўқилди.
2023 йилнинг февраль ойида наркотик модда эгасини алдаб, наркотикни ўзлаштириб олувчи “закладчик”лар 17 нафар шахс томонидан калтакланган эди.
UzNews нашрининг ёзишича, 30 май куни Тошкент шаҳар жиноят ишлари бўйича Яккасарой туман судида Жиноят кодексининг 28, 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) 4-қисми “б” банди, 277-моддаси (безорилик) 2-қисми “а, б, в, д” бандлари, 137-моддаси (одам ўғирлаш) 2-қисми “а,б,в” бандлари ва 130-1-моддаси (тазйиқни, зўравонликни ёки шафқатсизликни тарғиб қилувчи маҳсулотни тайёрлаш, олиб кириш, тарқатиш, реклама қилиш, намойиш этиш) 2-қисми “б” бандида назарда тутилган жиноятларни содир этганликда айбланаётган 14 нафар шахсга нисбатан суд ҳукми ўқилган.
Унга кўра, судланувчи А.Б. 6 йилга, судланувчилар Н.И. ва М.А. 5 йил-у 6 ойга, судланувчи М.Ф. 5 йилга, судланувчилар Т.Ш., Ф.С., А.С. ва З.Х. 4 йил-у 6 ойга, судланувчилар Ж.Ш., М.Ж., М.С., Т.Н., К.А. ва Б.Ш.га нисбатан 3 йил 6 ойга озодликдан маҳрум қилиш жазоси тайинланган.
Аввалроқ Фарғонада 17 ёшли бола яшаётган уйдан 30 килодан ортиқ наркотик моддалар топилгани тўғрисида хабар берилганди. Шунингдек, Самарқандда фуқаронинг уйидан салкам 32 кило марихуана топилган, Тожикистон ва Қирғизистондан олиб келинган наркотик моддалар ДХХ томонидан тўхтатиб қолинган эди.
Изоҳ (0)