Давлат хавфсизлик хизмати ходимлари томонидан Сурхондарё ва Фарғона вилоятларида Тожикистондан олиб келинган жами 25,8 килограмм гашиш гиёҳвандлик воситаси мусодара қилинди.
Қайд этилишича, ДХХ Сурхондарё вилояти бўйича бошқармаси ходимлари томонидан вилоят ИИБ билан ҳамкорликда тезкор тадбир ўтказилган. Тадбирда тожикистонлик наркосавдогар айланма йўллар орқали юборган 11 килограмм 942 грамм гашиш моддасини қабул қилиб олиб, Шўрчи туманидаги тўйхона яқинида жойлашган симёғоч остига яшириб кетмоқчи бўлган вақтида, ўзаро қариндош ҳисобланган 25 ёшли икки нафар маҳаллий фуқаро қўлга олинган.
Шунингдек, улар ажал оғусини белгиланган жойга қолдириб кетганларидан сўнг, уни бошқа шахс олиб кетиши кераклиги аниқланиб, тезкор тадбир давом эттирилган ва гиёҳвандлик воситасини хуфя жойдан олиш учун келган Узун туманида яшовчи 37 ёшли фуқаро ҳам ушланган.
Давлат хавфсизлик хизматининг Фарғона вилояти бўйича бошқармаси ходимлари томонидан ўтказилган тезкор тадбирда эса Қўқон—Фарғона йўналишида ҳаракатланаётган Tracker русумли автотранспорт воситаси Боғдод туманида тўхтатилиб, кўздан кечирилганда, унда Фарғона шаҳрида яшовчи, 1974 ва 1988 йилларда туғилган уч нафар шахс 11 килограмм 966 грамм гашиш моддасини олиб кетаётгани аниқланиб, процесссуал тартибда расмийлаштириб олинган.
Шунингдек, уларни бошқа автомашинада кузатиб бораётган ва гиёҳвандлик воситасининг ҳақиқий эгаси бўлган, Фарғона шаҳрида яшовчи 1990 ва 1993 йилларда туғилган эр-хотин ҳам қўлга олинган. Таъкидланишича, мазкур эр-хотин муқаддам гиёҳвандлик воситалари савдоси билан боғлиқ жиноятлари учун судланган.
Терговга қадар текширув давомида, улар Тожикистондан контрабанда йўли билан олиб келинган гиёҳвандлик моддасини Қўқон шаҳрида яшовчи 38 ёшли аёлдан сотиб олгани аниқланиб, у ҳам процессуал тартибда ушланган.
Бошқа ҳолатда эса Қўқон—Марғилон йўналишида ҳаракатланаётган Nexia русумли автотранспорт воситаси Қўштепа тумани ҳудудида тўхтатилиб, кўздан кечирилганда, унда йўловчи сифатида кетаётган Қўқон шаҳрида яшовчи 27 ёшли аёлга тегишли 1 килограмм 941 грамм гашиш моддаси борлиги аниқланиб, процессуал тартибда расмийлаштириб олинган.
Тожикистондан келтирилган мазкур гиёҳвандлик воситаси ҳам юқоридаги ҳолатда кўрсатилган, яъни Қўқон шаҳрида яшовчи 38 ёшли аёлга тегишли бўлиб, уни Марғилон шаҳрига сотиш учун олиб кетаётган бўлган.
Ҳозирда мазкур шахсларга нисбатан жиноят ишлари қўзғатилиб, қамоқ эҳтиёт чораси қўлланган.
Аввалроқ Фарғонада 17 ёшли бола яшаётган уйдан 30 килодан ортиқ наркотик моддалар топилгани тўғрисида хабар берилганди. Шунингдек, Самарқандда фуқаронинг уйидан салкам 32 кило марихуана топилган, Қирғизистонда Ўзбекистонга гиёҳванд моддалар ташиш билан шуғулланган шахс қўлга олинган эди.
Изоҳ (0)