Парагвайда ҳуқуқ-тартибот идоралари томонидан ўтказилган “Марангату” операцияси давомида 57 тонна марихуана мусодара қилинди.
Бу ҳақда мамлакат президенти Сантяго Пеня Х ижтимоий тармоғидаги саҳифасида маълум қилган.
“Биз Марангату операцияси билан уюшган жиноятчиликка жиддий зарба бера олдик, натижада 57 тонна сиқилган марихуана мусодара қилинди”, деди у.
Гиёҳванд моддалар савдогарлари марихуанани Бразилияга жўнатмоқчи бўлган, деди Парагвай президенти. Унинг сўзларига кўра, бу мусодара қилинган энг йирик гиёҳванд моддалар жўнатмасидир.
Операция натижасида тўрт киши қўлга олинди, дея қўшимча қилди Пена.
28 ноябрь куни Колумбия полицияси 225 тонна кокаинни мусодара қилгани ҳақида хабар берилганди.
Бундан ташқари, полиция олтита кемани ҳам қўлга олди. Бу кемалар Австралияга гиёҳванд моддаларни ташиш учун ишлатилгани айтилмоқда.
25 ноябрда эса Салвадорда 50 миллион долларлик кокаин ортилган қайиқ ушланган.
Эстеро-де-Жалтепеке кўрфазидан 752 км жануби-ғарбда уч колумбиялик 50 миллион долларлик гиёҳванд моддаларни олиб кетаётган кема қўлга олинган.
Салвадор президенти Найиб Букеле сўнгги саккиз ой ичида мамлакат ҳуқуқ-тартибот идоралари халқаро сувларда 15 тоннадан ортиқ кокаинни мусодара қилгани, уларнинг нархи тахминан 380 миллион долларни ташкил этишини айтган.
Изоҳ (0)