Туркиянинг Болу вилоятидаги оғир жиноятлар суди 78 кишининг ҳаётига зомин бўлган “Карталкая” меҳмонхонасидаги ёнғин иши бўйича айблов хулосасини қабул қилди. Иш бўйича 32 киши, жумладан, меҳмонхона эгаси ва шаҳар амалдорлари айбланувчи сифатида иштирок этмоқда. Бу ҳада НTV телеканали хабар бермоқда.
Прокуратура 13 киши, шу жумладан меҳмонхона эгаси учун “эҳтимолий қасддан қотиллик” ва “эҳтимолий қасддан соғлиққа зарар етказиш”нинг 78 та ҳолати бўйича жами 1998 йилгача қамоқ жазосини талаб қилмоқда.
Яна 19 киши “эҳтиётсизлик оқибатида бир неча кишининг ўлими ва соғлиғига зарар етказишда” айбланиб, уларга 22,5 йилгача озодликдан маҳрум қилиш жазоси таҳдид солмоқда.
Болу бош прокуратураси томонидан тайёрланган 98 саҳифали айблов ҳужжати Болунинг 1-сонли оғир жиноятлар судига юборилган. Айбланувчиларга нисбатан суд жараёни яқин кунларда бошланади.
Айблов хулосасида кўрсатилишича, айбланувчилар орасида меҳмонхона эгалари, бошқарув аъзолари ва компания раҳбарлари, шунингдек, Болу шаҳар ҳокими ўринбосари, шаҳар ёнғин хавфсизлиги хизмати бошлиғи ўринбосари ва ўт ўчирувчи бор.
Ёнғин 21 январь куни “Гранд Картал” меҳмонхонасининг ресторан қисмида юз берган. Ўша пайтда бинода 237 киши бўлган. Расмийлар ва мутахассисларнинг дастлабки баҳолашига кўра, меҳмонхонада ёнғинга қарши зарурий хавфсизлик чоралари кўрилмаган. Sabah газетасининг хабар беришича, ёнғин грилни ўчирмаган ходимларнинг хатоси туфайли келиб чиққан бўлиши мумкин.
Содир бўлган фожиали ёнғин 78 меҳмоннинг ҳаётига зомин бўлди, 50 дан ортиқ киши турли даражадаги тан жароҳатлари ва куйишлар олди.
Айблов хулосасига кўра, ҳодиса содир бўлган кечаси меҳмонхона ошпази, нонушта хизматини кўрсатувчи Фейсал Явер, меҳмонхонанинг тўртинчи қаватидаги ресторанда "грил-пластина" деб аталадиган электр панжарани ёққан. Аниқланишича, ёнғин юз бергунга қадар улаб қўйилган асбобнинг ўрта термостати кучли коррозия туфайли ишламай қолган, натижада асбоб ҳаддан ташқари қизиб кетган.
Қурилманинг қизиши оқибатида тўр ўтказгичларининг эскириши ва емирилиши туфайли қисқа туташув юз берган. Ёнғин соат 03:17 да бошланган, бунда қисқа туташув ток ўтказгичнинг ҳимоя элементлари томонидан бартараф этилмагани сабабли қурилманинг грил қисмидаги ҳайвон ёғлари буғланиб ёниб кетган ва "грил-пластина" қурилмасининг ички камерасида кичик чақнаш билан аланга олган.
Соат 03:24 да ёнғин ёниш камерасидан яқин атрофдаги ахлат идишига, у ердан эса суюлтирилган нефть газини узатиш шлангига тарқалган. Аланга шлангни эритиб, суюлтирилган нефть газини ёндириши натижасида тез тарқалаётган ёнғин 03:26 да “бошқариладиган чегаралардан чиқиб кетган” ва аланганинг ранги кўкка ўзгара бошлаган. Кейинчалик шифтга қопланган ОСБ локли плиталар ва ёғоч қопламалар тез газ ҳосил бўлишига сабаб бўлди, бу эса ўз навбатида ҳаддан ташқари тутун чиқишига ва оловнинг тез тарқалишига олиб келган.
Изоҳ (0)