Греция қирғоқни қўриқлаш хизмати Ўрта Ер денгизидаги Грециянинг Родос, Гавдос ва Крит ороллари яқинидаги қайиқларда сўнгги кунларда аниқланган 600 дан ортиқ ноқонуний муҳожирни қутқариб олди. Бу ҳақда Афина Македония ахборот агентлиги хабар бермоқда.
Маълумотларга кўра, 25 май куни Қирғоқ қўриқлаш хизматининг мувофиқлаштирилган ҳаракатлари натижасида муҳожирларни Туркия қирғоқларидан Родосга ноқонуний ўтказиш бўйича пухта ташкил этилган операция фош этилган.
Маълум қилинишича, патрул катеридан Родосдан Туркия томон катта тезликда сузиб кетаётган шубҳали яхта кўзга ташланган. Қирғоқни қўриқлаш катери дарҳол кема ортидан қувиб кетган ва товуш ҳамда ёруғлик сигналларидан фойдаланиб, тўхташни талаб қилган. Хавфли манёврларга қарамай, яхта охир-оқибат тўхтаган ва унинг бортидаги уч киши — 39, 44 ва 45 ёшли Туркия фуқаролари ҳибсга олинган. Бунга қадар улар Родос қирғоғига 76 нафар чет элликни — 29 эркак, 17 аёл ва 30 нафар вояга етмаганни тушириб қолдирган, сўнгра полиция ва порт ходимлари уларни муҳожирларни қабул қилиш марказига олиб борган. Ноқонуний шахсларнинг айтишича, улар Туркиянинг Фетҳие туманидан яхтада келган ва ҳар бири юк ташиш учун 5500 евродан тўлаган.
Шунингдек, хизмат вакиллари 23-25 май кунлари Гавдос ороли яқинидаги сувларда 446 кишини, шунингдек, Критдаги Ираклион шаҳри жанубидаги пляжларда 104 кишини қутқариб олган.
Келганларнинг аксарияти эркаклар бўлиб, улар орасида 2 аёл ва 18 нафар вояга етмаган бўлган. Муҳожирлар орасида беш киши одам ташувчи сифатида аниқланиб, қамоққа олинган.
Қирғоқни қўриқлаш хизмати ходимларининг маҳаллий ERТ News телеканалига маълум қилишича, ноқонуний муҳожирлар Критга жанубдан асосан осма моторли кичик қайиқларда келишади, еттита қайиқдан фақат биттаси ёғочдан ясалган. Барча қайиқлар ҳаддан ташқари юкланган бўлиб, денгизда кучли тўлқинлар бўлган тақдирда Шимолий Африка қирғоқларидан Критгача ташиш жуда хавфли.
Критга келган муҳожирларнинг аксарияти суданликлар бўлиб, улар орасида мисрликлар ва ливияликлар ҳам бор. Манбаларга кўра, барча қайиқлар Ливия қирғоқларидан йўлга чиққан.
Сўнгги йилларда Греция Яқин Шарқ, Осиё ва Африка мамлакатларидан келган муҳожирлар учун транзит мамлакатга айланди. Ҳар йили ўн минглаб муҳожирлар ва қочқинлар денгиз орқали келиб, Греция орқали Европанинг бошқа мамлакатларига ўтишга ҳаракат қилмоқда.
Изоҳ (0)