Анталияда тоғ-чанғи курортидаги меҳмонхонада содир бўлган ёнғин оқибатида 80 га яқин киши ҳалок бўлгандан сўнг, камида 50 та меҳмонхона ёпилди. Бу ҳақда NTV канали хабар берди.
Тегишли қарор Туркия Маданият ва туризм вазирлиги Инвестициялар ва тадбиркорлик бош бошқармаси томонидан қабул қилинган. Идора 81 та провинция губернаторларига туристик фаолият сертификатига эга бўлмаган ва рўйхатдан ўтмай фаолият юритаётган меҳмонхоналар тўғрисида хат йўллаган. Вазир ўринбосари Нодир Алпаслан имзолаган хатда бундай муассасаларни аниқлаш ва тегишли чоралар кўриш сўралган.
Текширувлардан кейин, Анталиянинг Муратпаша районидаги 50 та меҳмонхона ёпилган.
Ёнғин 21 январь куни Grand Kartal меҳмонхонасининг ресторан қисмида юз берган. Ўша пайтда бинода 237 киши бўлган. Расмийлар ва мутахассисларнинг дастлабки баҳолашига кўра, меҳмонхонада ёнғинга қарши зарурий хавфсизлик чоралари кўрилмаган. Sabah газетасининг хабар беришича, ёнғин грилни ўчирмаган ходимларнинг хатоси туфайли келиб чиққан бўлиши мумкин.
Фавқулодда ҳолатдан сўнг қўзғатилган жиноят иши доирасида 15 киши қамоққа олинган. Улар орасида меҳмонхона эгаси Холит Эргул ҳам бор. У жавобгарликни ходимларига юклаган, айниқса, бош ошпаз, ошхона ходимлари, меҳмонхона электриги ва қўриқчиларни айблаган. Ёнғин сабаби ҳозирча аниқланмаган, тергов олиб борилмоқда, 22 январь Туркияда мотам куни деб эълон қилинган.
Изоҳ (0)