Батуми шаҳридаги Leogrand меҳмонхонасида 24 ноябрь, жума куни кечаси содир бўлган ёнғин оқибатида 11 киши ҳалок бўлди. Бу ҳақда Грузия ИИВ маълумотларига таяниб, «ТАСС» хабар берди.
Жароҳат олганлар ва заҳарланганлар шифохонага етказилган. «21 киши Батумидаги бир нечта шифохонага етказилган бўлиб, уларнинг уч нафарига тиббий хизмат кўрсатилиб жавоб бериб юборилди, қолган 18 киши даволанишни давом эттирмоқда», — дея хабар қилади Батуми соғлиқни сақлаш тизимидаги манбалар. Таъкидланишича, 18 кишининг ҳаётига ҳеч нима хавф туғдирмаяпти.
Маълумотларга кўра, шифохонага етказилган одамлар орасида бир нафар Исроил, беш нафар Туркия ҳамда 12 нафар Грузия фуқароси бор.
Грузия бош вазири Георгий Квирикашвили «Шарқий ҳамкорлик» саммитини якунлаб, Брюсселдан воқеа жойига етиб келган.
Грузия президенти Георгий Маргвелашвили ёнғинни «одамларнинг ҳалокатига олиб келган фожиа» деб атаб, ҳалок бўлганларнинг яқинлари ва қариндошларига чуқур ҳамдардлик билдирди. Шунингдек, қутқарув ва ёнғин хавфсизлиги хизмати ходимларига «ўз ҳаётини хавф остига қўйиб ўзгалар жонини сақлаб қолганлиги» учун миннатдорчилик изҳор қилди.
Қутқарувчилар ва полиция ходимлари меҳмонхона биносидан 100 дан ортиқ одамни эвакуация қилишга муваффақ бўлган.
Изоҳ (0)