Мьянма пойтахти Нейпидода зилзиладан беш кун ўтиб, меҳмонхона вайроналари остидан бир киши қутқариб олинди. Бу ҳақда мамлакат Ёнғин хавфсизлиги бошқармасига таяниб, The Guardian хабар берди.
Мьянма ва Туркия қутқарувчиларининг қўшма гуруҳи 26 ёшли йигитни вайроналар ичидан топган. Қутқарувчилар омон қолган шахснинг соғлиғи ҳақида аниқ маълумот бермаган. Бироқ тарқалган видеога кўра, йигитга жиддий зарар етмаган. Қидирув ва қутқарув операциялари ҳали ҳам давом этмоқда. Аммо омон қолганларни топиш умиди тобора камайиб бормоқда.
Зилзиланинг ҳалокатли оқибатлари соат сайин ойдинлашмоқда. Бу аллақачон оғир гуманитар вазиятда бўлган Мьянма учун инқироздир. Қутқарув гуруҳлари ҳамон вайроналар остида қолганларни чиқаришда давом этмоқда, шифохоналар эса тўлиб-тошган. Бу фалокатнинг жисмоний ва руҳий жароҳатлари ўн йиллар давомида сақланиб қолади, деди Care гуманитар ташкилотининг Мьянмадаги директори Ориф Нур.
28 март куни юз берган кучли зилзила 53 миллион аҳолига эга қашшоқ мамлакат учун яна бир зарба бўлди. Мамлакат 2021 йилги ҳарбий тўнтаришдан бери фуқаролар уруши гирдобида қолган.
Биз яқинлашиб келаётган муссон мавсуми олдидан ёрдам кўрсатиш учун тезкор ҳаракат қилишимиз керак, чунки у даҳшатли инқирозни янада кучайтиради, деган БМТ матбуот котиби Стефан Дюжаррик.
Мьянмада юз берган 7,7 ва 6,4 балли зилзила қурбонлари сони 2886 кишига етди, яна 4639 киши жароҳатланди. Сўнгги маълумотларга кўра, 373 киши бедарак йўқолган. Уларнинг кўпчилиги ҳалок бўлгани тахмин қилинмоқда. Баъзи идоралар норасмий қурбонлар сонини 10 мингга баҳоламоқда. Қўшни Таиландда эса зилзила қурбонлари сони 22 кишига етган, юзлаб бинолар вайрон бўлган, 72 киши изсиз йўқолган.
Изоҳ (0)