АҚШ Давлат самарадорлиги департаменти (DOGE) раҳбари, тадбиркор Илон Маск “сўл кучларнинг ҳужумлари”дан чарчагани сабабли Америка ҳукуматидаги вазифасини тарк этишни истаяпти. Бу ҳақда Washington Post газетаси аноним манбага таяниб хабар бермоқда.
Нашрда таъкидланишича, Маскнинг махсус ҳукумат ходими сифатидаги мақоми жорий йилнинг май ойида тугайди ва бу муддат узайтириладими ёки йўқми, ҳозирча номаълум.
“Маск кетмоқчи, чунки у сўллар томонидан бўлаётган ёқимсиз ва ахлоқсиз ҳужумлар оқимидан чарчаган, деб ҳисоблайди”, дейилади газета хабарида.
Шу билан бирга, Маск ҳозирда ўзи бошқараётган DOGEънинг келгуси фаолияти ҳақида хавотирланмаяпти, чунки унинг жамоа аъзолари аллақачон “кўплаб федерал агентликларда” мустаҳкам ўрнашиб олган.
Оқ уйнинг номи ошкор этилмаган юқори мартабали ходими Washington Post нашрига айтишича, DOGE тарихий натижаларга эришган.
АҚШ президенти Дональд Трамп қарори билан ташкил этилган DOGE “беҳуда сарф-харажатларни қисқартириш ва федерал агентликларни қайта ташкил этиш” учун мўлжалланган. АҚШ Конгресси Вакиллар палатаси спикери Майк Жонсон яқинда Давлат бошқаруви самарадорлиги департаменти АҚШ ҳукуматининг Конгрессда рухсат олинмаган “ҳайратланарли даражадаги” харажатларини аниқлаганини маълум қилган эди.
Изоҳ (0)