Россияда мактабга бормайдиган мигрант болаларни оиласи билан мамлакатдан чиқариб юбориш таклиф қилинди. Россия президенти ҳузуридаги Фуқаролик жамияти ва инсон ҳуқуқларини ривожлантириш кенгаши раиси Валерий Фадеев шундай таклифни илгари сурди.
Амалдорнинг сўзларига кўра, Россияда 785 593 нафар “вояга етмаган чет эл фуқароси” истиқомат қилади. Аммо улардан фақат 192 254 нафари Россия муассасаларида таълим олаётганлар сифатида рўйхатга олинган.
Россиядаги чет эллик болаларнинг умумий сонига мактабгача ёшдаги болалар ҳам киради, дейди Фадеев.
Шунга қарамай, у қолган вояга етмаганларнинг камида 300 минг нафари Россиядаги мактабларга бориши кераклигини айтди. Россия Конституциясининг 43-моддаси ва Оила кодексининг 63-моддасига асосан, барча ота-оналардан фарзандларининг умумий таълим олишини таъминлаш талаб этилади.
Бундан ташқари, Марказий Осиё мамлакатларида ҳам ота-оналарга шунга ўхшаш мажбуриятлар юкланади (Қирғизистон конституциясининг 46-моддаси, Тожикистон конституциясининг 15-моддаси, Ўзбекистон конституциясининг 50-моддаси). Тожикистонда эса ўрта таълим, яъни мактабнинг 11-синфи мажбурий ҳисобланади, дейди Фадеев.
Унинг фикрича, Россияга келган муҳожирлар фарзандини мактабга бермаслиги “мамлакатдаги юз минглаб болаларнинг” ҳуқуқларини бузади.
Агар чет эл фуқаролари ўзлари турган мамлакатнинг қонунларига риоя қилишни истамаса, ватанларига қайтиб кецинлар. Фарзандларининг таълим олиш ҳуқуқини эса ўзлари келган мамлакат таъминлайди, деган амалдор.
Изоҳ (0)