Россия футбол иттифоқи (РФИ) бош котиби Максим Митрофановнинг таъкидлашича, FIFA ва УЕФА мавжуд чекловларни олиб ташлашга ва Россия клубларини халқаро мусобақаларга қайтаришга тайёр.
Унинг таъкидлашича, бу йўлда айрим Европа мамлакатларининг сиёсий қаршиликлари тўсиқ бўлиши мумкин:
— Сизнингча, келаси йилда Россия клублари Еврокубокларга қайтиши мумкинми?
— FIFA ва УЕФА доирасида кузатилаётган умумий тенденцияларга қараганда, эҳтимол қайтишимиз мумкин. Барчаси бунга тайёр, аммо сиёсатчиларнинг таъсири бўлади. Айниқса айрим Европа давлатлари Россияни қайтаришга жиддий қаршилик қилиш мумкин, — дея Митрофановнинг сўзларини келтиради Match TV.
Эслатиб ўтамиз, УЕФА ва FIFA томонидан Россия футбол иттифоқига нисбатан санкциялар 2022 йилнинг февраль–март ойларида жорий этилган эди. Маълумот учун, Россия Украинага қарши ҳарбий юришлари сабаб санкцияга учраган. Шу боис уч мавсумдан бери Россия Преймер Лигаси (РПЛ) вакиллари Еврокубокларда иштирок этмаяпти. Валерий Карпин бошчилигидаги миллий терма жамоа эса фақат ўртоқлик учрашувлари ўтказмоқда.
Изоҳ (0)