Россия президенти Владимир Путин жамоат жойларидаги белги, кўрсаткич, маълумот пештахталари ва бошқа визуал ахборот воситаларида хорижий сўзлардан фойдаланишни тақиқловчи қонун чиқарди. Бу ҳақда Мосcоw Times хабар берди.
Ушбу қарор матни Қонун ҳужжатлари расмий порталида эълон қилинган. Янги қоидалар 2026 йил 1 мартдан кучга кириши айтилган. Қонун “рус тилини давлат тили сифатида ҳимоя қилиш”, хорижий тиллардан ўзлаштириш даражасини пасайтириш ва “замонавий адабий тил меъёрлари”га риоя этилишини таъминлашга қаратилган.
Ҳужжатга кўра, истеъмолчиларга йўналтирилган барча маълумотлар - реклама, пештахта, лавҳа, ва бошқалар фақат рус тилида тақдим этилиши керак. Хорижий “сале”, “шоп” каби сўз ва иборалардан фойдаланиш тақиқланади. Ахборотни хорижий тилларга таржима қилишга фақат маъно визуал дизайнга тўлиқ мос келса, рухсат берилади.
Шунингдек, турар жой мажмуалари ва бошқа объектларга чет-эл номларини беришга тақиқ киритилмоқда. Бундай номларнинг барчаси кирилл алифбосида ёзилиши керак. Бироқ қонун фирма номлари, товар белгилари ва хизмат кўрсатиш белгиларига нисбатан татбиқ этилмайди. Чунки уларнинг асл талаффузи сақланиб қолиши лозим.
Давлат Думаси раиси Вячеслав Володин аввалроқ ушбу қонунни “рус тилини ҳимоя қилишдаги биринчи жиддий қадам” деб атаган. У бу кўчаларда хорижий ёзувлар сонини сезиларли даражада камайтиришини айтган.
Путин 5 июнь куни “вулгар ва механик ўзлашмалардан” халос бўлишга чақирганди. Унга кўра, ўзлашмалар тилни бойитмайди, балки унинг маъносини бузади. Шунингдек, президент жамоат жойларида лотин ва бошқа ҳарфлар ўрнига кирилл алифбосидан кенг фойдаланиш зарурлигини таъкидлаганди.
Изоҳ (0)