АҚШнинг Миннеаполис шаҳрида (Миннесота штати) полиция томонидан қўлга олинган афро-америкалик Жорж Флойднинг ўлими туфайли келиб чиққан аҳоли норозилиги АҚШнинг кўплаб йирик шаҳарларига тарқалди, деб хабар бермоқда Associated Press.
Хабарда айтилишича, бу жараён Феникс (Аризона штати), Денвер (Колорадо штати), Лас-Вегас (Невада штати), Лос-Анжелес (Калифорния штати), Атланта (Жоржия штати) ва Хьюстон шаҳарларида (Техас штати) тинч намойишлар билан бошланди. Минглаб одамлар «У нафас ололмаётганини айтганди. Жоржга адолат» деб ёзилган плакатлар кўтариб чиқди.
Атлантада тинч намойишлар бир неча соат давом этган. Кейин эса намойиш иштирокчилари полиция машиналарини синдиришни бошлаган, улардан бирини ёқиб юборган. CNN телеканалининг маҳаллий филиалига ва ресторанга бостириб киришган. Намойишчилар тош ва шиша идишлар отишидан полициячиларнинг уч нафари жароҳатланган.
Нью-Йоркда намойишчилар Бруклиндаги Barclays Center спорт майдони ёнида тўпланган. Қайсидир вақтда оломон полиция кордонларига ташланиб, уларни ёриб ўтишга уринган.
Марҳум Флойд туғилиб ўсган Хьюстон муниципалитетида эса бир неча минг киши тўпланган. У ерда полиция милтиқ ушлаб, ундан оломонни қўзғашда фойдаланишга уринган аёлни қўлга олган.
Эслатиб ўтамиз, Жорж Флойд 25 май куни Миннеаполисдаги касалхонада вафот этган. Полиция уни дўконда сохта ҳужжатлардан фойдаланганликда гумонлаб, қўлга олмоқчи бўлганида қаршилик кўрсатган. Шундан сўнг полиция уни тутиб, ерга ётқизган ва тиззаси билан бўйнини босган.
Воқеа акс этган видео ижтимоий тармоқларда тарқалган. Унда Флойд ҳаво этишмаётганини айтган, бироқ полициячи унга эътибор қилмаган. Унинг ўлимидан сўнг Миннесота штатида оммавий норозилик бошланган.
Дастлаб Миннеаполис шаҳрида фавқулодда вазият жорий этган, кейин эса шаҳар мери жума куни кечасидан бошлаб коммендантлик соати эълон қилган. Миннесота штати губернатори тартибсизликни бартараф этиш учун АҚШ Миллий гвардияси аскарларини жалб этди. Президент Дональд Трамп Флойд ўлими юзасидан имкон қадар пухта тергов ўтказишни топширди.
Норозилик намойишларидан кейин тўрт нафар полициячи ишдан ҳайдалган, собиқ полициячи эса гумонланувчини ўлдирганликда айбланмоқда
Изоҳ (0)