Жанубий Африка Республикасида (ЖАР) ноқулай об-ҳаво туфайли камида 57 киши ҳалок бўлди. Бу ҳақида Al Jazeera хабар бермоқда.
Телеканал маълумотларига кўра, ғоят совуқ ҳаво оқими мамлакатнинг айрим ҳудудларига кучли ёмғир ва қор ёғишини олиб келган. Бунинг натижасида мамлакат бўйича иккинчи йирик вилоят ҳисобланган Шарқий Кейпда кучли сув тошқини юз берган. Айнан шу табиий офат қурбонларга сабаб бўлди.
Минтақа маъмурияти раҳбари Оскар Мабуяненинг айтишича, бедарак йўқолганларни қидириш ишлари давом этаётгани сабабли, расмийлар ҳалок бўлганлар сони яна ортишини кутмоқда. Жумладан, олти нафар юқори синф ўқувчиси ҳам ноқулай об-ҳаво қурбонига айланган.
“11 июнь куни тушга келиб Шарқий Кейп вилоятида ҳалок бўлганлар сони 49 нафарга етди. Энг кўп талафот кўрган ҳудуд ОР Тамбо муниципал округи бўлиб, қурбонларнинг аксарияти шу ерда қайд этилди. Улар орасида кўприкдан дарёга қулаб тушган мактаб автобусидаги тўрт нафар ўқувчи ҳам бор. Яна тўрт нафар ўқувчини қидириш ишлари давом этмоқда, улар бедарак йўқолган деб ҳисобланмоқда”, деди у матбуот анжуманида.
Мабуяненинг аниқлик киритишича, одамлар ўлимининг асосий сабаблари жала туфайли содир бўлган кўчкилар, шунингдек, йўллардаги қалин қор қатлами бўлган. Мамлакатда қор кўчкилари сабабли бир қатор автомобиль йўллари ёпилган. Ҳозирча ЖАРнинг жанубий ва шарқий минтақалари кўпроқ зарар кўрган.
Расмийлар юз минглаб хонадонларда электр таъминоти узилгани, камида 58 та мактаб ва 20 та шифохона сув тошқинларидан зарар кўрганини маълум қилди. Бундан ташқари, 500 га яқин одам уйлари вайрон бўлгани ёки қаттиқ шикастлангани сабабли вақтинчалик жойлаштириш марказларига кўчирилди.
“Мен ҳеч қачон бундай ҳолатни кўрмаганман”, дея эътироф этди Мабуяне.
Таъкидланишича, об-ҳаво башоратчилари бир неча кун олдин минтақага ҳалокатли ёмғир ва қор хавф солаётгани ҳақида огоҳлантирган.
Маълумот учун, совуқ ҳаво оқими ЖАРга 9 июнь куни кириб келган. Айрим ҳудудларда тунги ҳарорат нолдан паст кўрсаткичларгача тушган. Синоптикларнинг огоҳлантиришича, ЖАРда бошланган қиш жорий ўн йилликнинг энг қаттиқ қишларидан бирига айланиши мумкин.
Изоҳ (0)