Дунёнинг энг бой 5 спортчиси: Роналдо, Месси ва бошқалар миллиардларини нимага сарфлайди?

Спортдаги ғалабалар уларга жаҳон шуҳрати ва миллионлаб мухлисларни олиб келди. Ва яна реклама шартномалари, уларни дунёдаги энг бой спортчиларга айлантирди. Қуйидаги танловимизда спортнинг бешта афсонаси ва уларнинг энг катта харажатлари ҳақида билиб оласиз.

Криштиану Роналдо - шахсий самолёт, суперкарлар тўплами ва яхта

2024 йилда Криштиану Роналдо Sportico рейтингида дунёдаги энг кўп маош оладиган спортчи сифатида биринчи ўринни эгаллади. Унинг йиллик даромади 260 миллион долларга етди, уларнинг асосий қисми Саудия Арабистонининг “Ан-Наср” клуби билан шартнома бўйича маош, қолган қисми эса рекламадан тушган даромаддан иборат.

Португалиялик футболчи топган миллионларини элита кўчмас мулкларга -Буюк Британиянинг Чешир шаҳридаги 5 миллион долларлик қаср, Дубайдаги 30 миллион долларлик вилла ва Ар-Риёддаги 15 миллион долларлик қароргоҳларни сотиб олишга сарфлаган. Лекин футболчи қимматбаҳо автомобилларга ҳам алоҳида меҳр қўйган. Унинг гаражида Ferrari, Lamborgini, Bugatti ва Rolls-Royce каби моделларни ўз ичига олган 20 дан ортиқ суперкарлар бор.

Бироқ Роналдо нафақат спорткарларни яхши кўради. 2020 йилда у 6,8 миллион долларга 27 метрлик яхтани сотиб олди, 2024 йил охирида эса 72 миллион долларга шахсий самолёт харид қилди. Ушбу самолёт ичида ҳатто сауна ҳамда бир нечта ётоқхона, ошхона ва ҳаммомлар ҳам бор.

Флойд Мейвезер- 100 та автомобиль ва санъат асарлари

2025 йил маълумотларига кўра, боксчи Флойд Мейвезернинг бойлиги 400 миллион долларга баҳоланади. 50 та жангда 50 та ғалабани ўз ичига олган бутун фаолияти давомида у 1,6 миллиард доллар ишлаб топди ва тарихдаги энг бой спортчилардан бирига айланди.

Боксчи ўзининг топган пулларини осонликча сарфлайди. У эксклюзив автомобилларни тўплайди, унинг автопаркида Bugatti Veyron, Ferrari ва 4,8 миллион долларга баҳоланган ноёб Koenigsegg SSXR Trevita каби 100 дан ортиқ машиналар бор.

Шунингдек, боксчи замонавий санъатнинг катта мухлисидир. У бир соат ичида кўргазмада 10-12 та асарни бир неча миллион долларга сотиб олишга қодир. Унинг тўпламида қимматбаҳо расмлар ва ҳайкаллар, жумладан, ғайриоддий асарлар, масалан, 100 долларлик купюралардан ёндирилган ҳайкал мавжуд.

Jacob&Cо компаниясининг 18 миллион долларлик қимматбаҳо заргарлик буюмлари ва бриллиантли соатлари “пул қироли” образига яна бир штрихдир.

Лионель Месси - дунёдаги энг қиммат автомобиль ва шахсий самолёт

2025 йилда Лионель Месси Кристиано Роналдодан кейин иккинчи даромадли футболчи ҳисобланади. Унинг “Интер Майами” клубидаги йиллик асосий маоши 12 миллион долларни ташкил этади, спорт ва рекламадан олинган умумий даромади эса 65 миллион доллардан ошади.

Футболчи ўзининг топган пулларини кўчмас мулкка сарфлайди - унинг бир неча уйи, қасрлари ва қароргоҳлари бор. Энг йирик харид Росариодаги 10 000 метр квадрат майдонга эга, 15 та автомобилга мўлжалланган ер ости гаражи, кинотеатр, спорт зали ва сузиш ҳавзаси бўлган қадимий мулкдир.

Албатта, Мессининг ҳам автомобиллар тўплами бор, улар орасида ноёб намуналарни ҳам учратиш мумкин. Масалан, Pagani Zonda Тrisolore (қўлда йиғилган), бундай машиналар дунёда атиги учта. Ва яна дунёдаги энг қиммат автомобиль - 1957 йилги Ferrari 335 S Spider Scaglietti. Месси уни 2016 йилда 37 миллион долларга аукционда сотиб олган. Лекин, футболчининг энг қиммат транспорти бу 2024 йилда 59 миллион долларга сотиб олинган шахсий самолётидир.

Рожер Федерер - пойабзал брендига ва гўштга инвестициялар

2025 йилда Рожер Федерер 1,59 миллиард долларлик бойлиги билан дунёнинг энг бой теннисчилари рейтингида биринчи ўринда туради. Шу билан бирга, у ўз фаолияти давомида (1998-2022) 150 миллион доллар соврин жамғармасини қўлга киритган бўлса-да, реклама ва инвестициялардан яна 1 миллиард доллар олган.

Рожернинг пулга нисбатан ўзига хос ёндашуви бор. У капиталининг 70 фоизини Швейцария банкларида сақлайди, қолган қисмини эса инвестициялар ва кўчмас мулкка сарфлаган. Теннисчи Цюрих кўли қирғоғида Алп тоғларига қараган уйни харид қилган. Шунингдек, унинг Дубайдаги осмонўпар бинода пентхауси, Швейцариянинг Валбелла курортида шалеси ва Жанубий Африкада вилласи бор.

2019 йилда спортчи 3,3 миллиард долларлик даромадга эришган Он Руннинг брендига 50 миллион доллар инвестиция қилган, Федерернинг улуши эса 450 миллион долларга баҳоланмоқда. Яна 30 миллион долларни Рогер ўсимлик гўшти ва сути ишлаб чиқаришга инвестиция қилган.

Льюис Ҳемилтон - санъат ва соатлар коллекцияси

2025 йил январь ойида автопойгачи Льюис Ҳемилтон автоспорт тарихида рекорд бўлган 100 миллион долларлик йиллик шартнома имзолаб, Ferrari’га тарихий ўтишни амалга оширди. Бу нафақат уни тарихдаги энг кўп маош олувчи пойгачи мақомига кўтарди, балки уни миллиардер мақомига яқинлаштирди: унинг фаолияти давомида олган умумий даромади 970 миллион долларга етди.

Ҳемилтон кўчмас мулкларга — Манҳеттендаги пентхаус, Монте-Карлодаги апартаментлар, Колорадода мотокр треки ва автомобиль коллекцияси учун ангар билан жиҳозланган ранчога инвестиция қилган. Бундан ташқари, Ҳемилтон 47 та автомобилга эга, шу жумладан эксклюзив моделлар ва рулда унинг исми ўйиб ёзилган махсус автомобиллари ҳам бор.

Пойгачининг бошқа активлари орасида 28 метрлик яхта ва 680 минг долларга баҳоланган 15 та қимматбаҳо соатлар коллекцияси, шунингдек, расмлар ва Африка санъат буюмлари бор.

Энг яхши спортчилар учун миллионлар шунчаки рақамлар эмас, балки мерос яратиш воситаси. Улар кўчмас мулк ва автомобилларга инвестиция қиладилар, бизнес империяларини қурадилар ва ўзларидан кейин қоладиган санъат асарларини тўплайдилар. Аммо асосий сармоя — спортдан кетганидан кейин ҳам даромад келтирадиган ўз брендига эга бўлишдир.