Табиат кучлари одамлар ихтиёридан ташқарида бўлгани учун қадимги одамлар турли илоҳлар, маъбудларни ўйлаб топишган. Гарчи тараққий этган бугунги замонимизда бундай қарашлар эриш туюлса-да, табиат иродасига бўйсунмасдан иложимиз йўқ.
Хусусан, охирги ҳафталардаги қақшатқич совуқ бутун давлат инфраструктурасига салбий таъсир кўрсатмасдан қолмади. Аммо бу ҳафта қаҳратон бир оз сусайди. Буни айрим ҳудудларда электр кўпроқ берилаётганидан ёки метан навбатлари йўқолганидан сезиш мумкин. Дам олиш кунлари эса Эрондан кириб келган қуруқ ва илиқ ҳаво мамлакатимиз жанубини +22 даражагача, бошқа ҳудудларини +12 даражагача қиздирди. Аммо баҳор келди деб ўйлаган дарахтларга барг ёзиб юборишни маслаҳат бермаймиз, чунки гидрометеорологлар келаётган ҳафта ҳаво яна совушини ваъда қиляпти. Демак, ўқувчиларимизга пальто-шарфларни ҳозирча тахламасликни, ҳайдовчиларга кўпроқ ёқилғи қуйиб олишни ва антифризни тўкмасликни, уй иситиш тизимини эса созлаб қўйишни, энг асосийси, қишлоқ жойдагилар ёқилғини ғамлаб қўйишни маслаҳат берамиз.
* * *
Кўпчиликнинг эсидан чиқаёзган коронавирус мавзусига қайтамиз. Вируснинг янги штамми аниқлангандан бери шифокорларнинг ҳаловати йўқолган. Нафақат шифокорлар, балки давлатлар карантин чораларини яна киритмоқда. Ўзбекистон ҳам бундан мустасно эмас.
Республика махсус комиссиясининг қарори билан 2020 йил декабридан 2021 йил 10 январгача Буюк Британия, Италия, Дания, Австрия, Австралия, Нидерландия ва Жанубий Африка Республикаси давлатлари билан халқаро авиарейслар (кириш, чиқиш ва транзит рейслар орқали республикага кириш) тўхтатилган эди. Бугунгача ушбу мамлакатларда эпидемиологик вазият мураккаблигича қолгани сабабли 2021 йил 10 январига қадар киритилган чеклов муддати 1 февралгача узайтирилди.
* * *
Ўтган ҳафта Жиззахда Мустақиллик кўчасидаги олти қаватли уй худди қумдан қурилган уйча каби қулаб тушгани видеоси тарқалган эди. Бу ҳафтада жамоатчиликнинг диққат-эътибори шу қулаган уйга қаратилди. Харобалар остидан эса анчагина фактлар чиқа бошлади.
Очилбой Раматов бошчилигидаги ҳукумат комиссияси бино қулаши сабабини ўрганадиган бўлди. Маълум бўлишича, уйни қўй наслчилиги билан шуғулланувчи фермер хўжалиги қураётган бўлган. Қурилишнинг буюртмачиси ҳам, пудратчиси ҳам унинг эгаси, яъни «Баракали Қоракўл Чорвадор» фермер хўжалигининг ўзидир. Унинг раҳбари эса қурилишга алоқаси йўқ.
Бунинг устига, унинг ёнидаги олти қаватли иншоотнинг ҳам пойдеворлари чўкиб хавфли ҳолатда турибди. Жиззах шаҳар бош меъморининг берган маълумотига кўра, тадбиркор қулаган бинонинг орқасидаги иншоотни ўзбошимчалик билан ноқонуний қуриб олган.
Қурилиш вазирининг ўринбосари Козим Тўлаганов «Кўрсатиб ўтилган камчиликлар берилган тақдирда ҳам энг хавфли томони — қурилишда на уста, на ‘прораб’ бўлган. Ўзи билганича иш олиб борган», деб бу ҳақда баёнот берди. Қурилиш вазири Ботир Зокиров эса бу ерда коррупцион схема бўлгани ҳақида гапирди.
Воқеага Шавкат Мирзиёев ҳам эътибор қаратиб, «Жиззах вилояти ҳокимининг қурилиш бўйича ўринбосари бизнинг сиёсатимизга хиёнат қилган. Буни ҳамма билиши лозим. Унинг бутун тўдасига қонуний жазо кўриш керак. Шоли курмакциз бўлмаганидек, барибир эски замонни қўмсаган ноинсофлар ҳам бор. Улар эркинлик, очиқлик сиёсатини тушунмайди», — деб айтди.
* * *
Бу ҳафта таълим соҳасидаги янгиликларга бой бўлди.
Тошкент шаҳрида Санкт-Петербург давлат университети Федерал давлат бюджети олий таълим муассасаси филиали ташкил этилади. Филиалда ўқиш бакалавриат ва магистратура мутахассисликлари бўйича қуйидаги йўналишларда ташкил этилади: филология (Шарқ тиллари бўйича); мамлакацҳунослик ва хорижий мамлакатлар иқтисодиёти (Шарқ мамлакатлари бўйича); биотиббиёт (кимё, биология, физика, психология ва бошқалар).
Шавкат Мирзиёев 15 январь куни Тошкент шаҳри ва Юнусобод тумани фаоллари билан учрашди. Учрашувда ЖIDУ талабаси сўз олиб, бўлажак дипломатлар элчихоналарда амалиёт ўташини таклиф қилди. Президент 17 ёшли талаба қизнинг таклифини қўллаб-қувватлаб, «...бу бўйича тегишли қарор ҳам чиқарамиз. Аммо сизга хоҳлаган вақтингизда Америка элчихонасига бориб, бир ойми ёки бир йилми, истаганингизча ишлаб келиш имкониятини бераман», деди.
Худди шу йиғинда президент яна бир янгиликнинг учини чиқарди. Президент университетлари ташкил этилади ва унда Оксфорд таълими жорий қилинади. Унинг ҳамма ўқитувчилари чет элдан бўлади. «...Нега? Чунки болаларимиз чет элга кетиб, уларнинг 50 фоизи қайтиб келмаяпти. ‘Энг катта ақл’ кетяпти. Уларга у ердаги шароит ёқади, ойлик катта. Аммо энди мен шу шароитларни яратиб, уларни ўзимизда ўқитмоқчиман. Кетмасин болаларимиз...», деди Шавкат Мирзиёев.
* * *
Дарвоқе, таълим соҳасидаги энг катта янгиликни ёзмабмиз – Абдуқодир Тошқулов Олий ва ўрта махсус таълим вазири бўлди. У бунгача ТерДУ ректори эди. Аввалги вазир Иномжон Мажидов эса Ўзбекистон Миллий университетига ректор этиб тайинланди.
Энди ҳафта тайинловларига батафсилроқ тўхталамиз. Шундай қилиб, Абдуқодир Тошқулов олий таълим вазири, Шерзод Ҳидоятов коммунал хизмат кўрсатиш вазири лавозимига маъқулланди. Саидкамол Ходжаев бошқа ишга ўтгани муносабати билан қишлоқ хўжалиги вазири ўринбосари лавозимидан кетди.
Юнусобод тумани ҳокими лавозимида ишлаб келган Раҳмонбек Усмонов Ўзбекистон Республикаси транспорт вазирининг ўринбосари лавозимига тайинланди. Усмонов олдин Тошкент шаҳар ҳокими ҳам бўлган.
Давлат солиқ қўмитаси раисининг биринчи ўринбосари — Кадастр агентлиги директори Халилилло Тўрахўжаев Олий суд раисининг фуқаролик ишлари бўйича ўринбосари лавозимига ўтди. У бунга қадар Давлат солиқ қўмитаси раисининг биринчи ўринбосари — Кадастр агентлиги директори, унгача эса Давлат хизматлари агентлиги директори лавозимларида фаолият юритган. У бунга қадар Давлат солиқ қўмитаси раисининг биринчи ўринбосари — Кадастр агентлиги директори, унгача эса Давлат хизматлари агентлиги директори лавозимларида фаолият юритган, деб ёзмоқда «Davletov.uz».
Ҳар қандай об-ҳавода «Daryo.uz» сизга энг қайноқ янгиликларни тақдим этади. Биз билан қолинг.
Изоҳ (0)