Марказий Осиё давлатлари орасида энг паст ишсизлик даражаси Қирғизистонда(3,3 фоиз) қайд этилди. Халқаро меҳнат ташкилоти (ХМТ) тегишли маълумотни эълон қилди.
Ташкилот дунёнинг 187 та давлати орасида ишсизлик даражаси рейтингини тақдим этган. Ўзбекистон мазкур рейтингда 113-ўринни эгалламоқда. Марказий Осиё мамлакатларида эса фоизлик кўрсаткичлар қуйидагича: Туркманистонда ишсизлик даражаси 4,3 фоиз (117-ўрин), Ўзбекистонда 4,5 фоиз, Қозоғистонда эса 4,8 фоиз (104-ўрин).
Минтақадаги энг юқори кўрсаткич Тожикистонда кузатилган, у ерда ишсизлик даражаси 11,6 фоизга (29-ўрин) етган. Бу қўшни мамлакатлар кўрсаткичларидан анча юқори.
Дунёдаги энг ёмон кўрсаткичлар Эсватини (34,4 фоиз), Жанубий Африка Республикаси (33,2 фоиз), Жибути (25,9 фоиз), Боцвана (23,1 фоиз) ва Габонда (20,1 фоиз) қайд этилган. Ишсизлик даражасининг энг паст кўрсаткичлари эса Қатарда (0,1 фоиз), Камбожа (0,3 фоиз) ва Нигерда (0,4 фоиз) кузатилмоқда.
Дунёда ўртача ишсизлик даражаси 5 фоизни, Африкада 6,5 фоизни, Америкада 5,5 фоизни, Осиё-Тинч океани минтақасида 4,2 фоизни, Европа ва Марказий Осиёда 5,5 фоизни ташкил этди.
Изоҳ (0)