Таниқли актрисалар терисининг мукаммаллиги фақат қимматбаҳо косметика маҳсулотларига эмас, балки оддий уй шароитидаги воситаларга ҳам боғлиқ. Қуйида дунёга машҳур аёлларнинг ғайриоддий гўзаллик лайфхаклари ва мутахассислар изоҳларини жамладик.
Синди Кроуфорд — тоник ўрнига сутли сув
Таниқли модел Синди Кроуфорд фақат ичимлик суви билан юзини ювади ва унга сут ҳам қўшади. Бу “коктейл” терига соғлом кўриниш, юмшоқлик ва ипакдек силлиқлик беради.
Сутли сув универсал намлантирувчи ва озиқлантирувчи восита ҳисобланади. Синди уни тоник ўрнида ишлатади: аралашмага пахта дискини ботириб, юзини кунига икки маҳал артади. Бундан ташқари, аралашмани пуркагичли идишга солиб, мист сифатида юзига сепади.
Мутахассислар таъкидлашича, бу усул самарали бўлиши учун сут янги бўлиши керак.
Эмма Стоун — ювиниш гелига сода қўшади
Эмма тайёр тозаловчи воситалардан фойдаланса-да, уларга бир оз ош содаси қўшади. Бу оддий қўшимча актрисанинг терисини силлиқ қилади ҳамда тошмаларга қарши курашишда ёрдам беради.
Косметологлар фикрича, истеъмол содаси ҳақиқатан ҳам енгил скраб вазифасини бажаради. Аммо бу ерда меъёр муҳимдир: бир марталик гел ҳажмига атиги бир чимдим сода қўшиш етарли. Бундай аралашмани ҳафтасига бир-икки марта ишлатиш тавсия этилади.
Жизел Бундхен — юзига кола сепади
Жизел интервьюларидан бирида баъзан юзини кока-кола билан ювишини айтиб ўтган. Унинг фикрича, бу ичимлик юзга соғлом ва тетик кўриниш беради. Сабаби — газли пуфакчалар терида ёрилиб, қон айланишини фаоллаштиради.
Бироқ дерматологлар бу усулдан эҳтиёткорлик билан фойдаланишни тавсия қилади. Унинг ўрнига хавфсизроқ альтернатив сифатида газли минерал сувни ишлатиш мумкин. У терига зарар етказмайди ва айнан шундай “пуфакчали” эффектни беради. Кока-кола эса кўп миқдорда шакар ва агрессив моддаларга эга бўлиб, тери учун хавфли ҳисобланади.
Салма Ҳаек — макияжни ўчириш учун кокос ёғи
Салма Ҳаек эрталаблари умуман юзини ювмайди — бу ишни фақат кечқурун амалга оширади. У бу одатни болалигидан такрорлаб келган. “Терингиз ўзининг табиий ёғларига муҳтож — фақат шунда у нам ва соғлом бўлади. Буни менга бувим ўргатган”, дейди актриса.
Кечқурун эса Салма макияжни кокос ёғи билан эҳтиёткорлик билан тозалайди, Бу восита кир ва ёғларни самарали эритади. Сўнг актриса юзини яхшилаб ювади ва устидан илиқ атиргул суви билан компресс қўяди.
Баъзи мутахассислар Салма услубини қўллаб-қувватлайди, бошқалар эса эрталабки ювинишни мажбурий деб ҳисоблайди.
Изоҳ (0)