“Ўзбекнефтгаз” 2025 йил сентябрдан Аи-80 бензини ишлаб чиқаришни тўлиқ тўхтатмоқчи. Бу ҳақда “Кун.уз” хабар берди.
Маълум қилинишича, компания жорий йилнинг ўзида Аи-80 русумли автобензин тизим корхоналари омборларида тўлиқ тугатилишини, 2026 йилдан фақат юқори октанли автобензин сотишга ўтилишини режа қилган.
“Ўзбекистон–2030” стратегиясини “Атроф-муҳитни асраш ва яшил иқтисодиёт” йилида амалга оширишга оид давлат дастури тўғрисидаги президент фармонида 2025 йил якунига қадар Аи-80 бензинидан фойдаланиш ва сотишни чеклаш учун барча куч ва ресурслар сафарбар этилиши белгиланган.
Мамлакатда ушбу маркали бензиндан босқичма-босқич воз кечиш режалаштирилаётгани ҳақида 2024 йил бошларида Энергетика вазирлиги хабар берганди. Вазирлик бу бензин кўп мамлакатларда тақиқланганини, ҳатто нефть маҳсулотларини тўлиқ импорт қиладиган Қирғизистон ва Тожикистонда ҳам аллақачон истеъмолдан олинганини билдирганди.
2024 йил 29 январь куни ўтказилган йиғилишда Шавкат Мирзиёев бош вазир Абдулла Ариповга 2025 йилдан Аи-80 маркали бензиндан воз кечиш масаласини узил-кесил ҳал қилиш бўйича топшириқ берганди. 2025 йилга бориб Фарғона нефтни қайта ишлаш заводида Аи-80 ишлаб чиқарилиши тўхтатилса, 2026 йилга бориб Бухоро нефтни қайта ишлаш заводи тўлиғича сифатлироқ ёнилғи ишлаб чиқаришга ўтказилиши маълум қилинган эди.
Ўзбекистонда бензин ишлаб чиқарувчи заводлар
Улар иккита бўлиб, биринчиси — “Ўзбекнефтгаз”га қарашли Бухоро нефтни қайта ишлаш заводи, иккинчиси — “Saneg”га қарашли (хусусий) Фарғона нефтни қайта ишлаш заводи. Сурхондарёда, Чинозда нефтни қайта ишлаш заводлари бор, кичкина партияда бўлса ҳам, Аи-80 бензини ишлаб чиқаради. Кичик истисноларни ҳисобга олмаганда, Ўзбекистонга ташқаридан 80 бензини кириб келмайди.
Аи-80 ўрнига фақат юқори октанли автобензин
“Кун.уз” ихтиёридаги ҳужжатга кўра, “Ўзбекнефтгаз” 2024 йил январь ойида Хитой билан 60 фоиз ва 40 фоиз ҳажмда юқори октанли йилига 1 млн тонна Аи-92 ва Аи-95 бензинлари ишлаб чиқариш борасида лойиҳани амалга оширишга келишган. Ушбу лойиҳа доирасида Бухоро НҚИЗда қўшилма (присадка) ёрдамида юқори октанли Аи-92 присадкали автобензин ишлаб чиқаришни ўзлаштириш бўйича ишлар олиб борилган, тажрибалар ўтказилиб, присадка тури аниқланган, бензиннинг тажриба-синов партияси ишлаб чиқарилган, присадка сақлаш ва аралаштириш учун сиғимлар инфраструктураси яратилиб, присадкали Аи-92 бензинини серияли ишлаб чиқариш йўлга қўйилган. Компания присадка ҳисобига таннархни арзонлаштирмоқчи, бироқ нарх борасида аниқ ҳисоб-китоблар келтирилмаган.
2025 йилда “Бухоро НҚИЗ” МЧЖ томонидан жами 1 030 минг тонна, жумладан, 487 минг тонна Аи-80 русумидаги автобензин ва 543 минг тонна Аи-92+ русумли автобензин ишлаб чиқарилиши режалаштирилган. Бунда, Аи-80 русумидаги автобензинни ишлаб чиқариш сентябрь ойига қадар кўзда тутилган бўлиб, сентябрь ойидан бошлаб фақат Аи-92+ русумидаги автобензин (ойига ўртача 90 минг тоннадан) ишлаб чиқарилади. Натижада 2025 йилнинг ўзида Аи-80 русумли автобензин тизим корхоналари омборларида тўлиқ тугатилади ва 2026 йилдан фақат юқори октанли автобензин сотишга ўтилади.
Изоҳ (0)