Идеал ёзги гардероб — сон саноғи йўқ кийимлар эмас, балки энг керакли либослардир.
Жазирамада кийимлар турли хил ҳаётий вазиятларга мос бўлиши ҳамда энг муҳими ҳаво ўтказадиган матодан тикилган бўлиши муҳим. Қуйида ҳар бир аёлга ёз давомида керакли бўладиган 5 та кийим ҳақида сўз боради.
Зиғир матосидан тикилган кофта
Зиғир толали кофта — ёзнинг моҳиятини энг аниқ ифода этадиган либос, десак муболаға бўлмайди.
Зиғир матосидан тикилган кофтани ҳар қандай кийим билан мосласа бўлади: пляж кийимининг устига, жинсилар билан, мини юбка ёки узун шимлар билан.
Энг яхши моделлари — бир оз оверсайз ва орқаси узунроқ тикилган кофталар. Мутахассислар ёзда оқ, қаймоқ ранг, оч кўк ва жигарранг либосларга эътибор қаратишни тавсия этишади.
Умуман олганда, зиғир толасидан тикилган кўйлак ёз учун мукаммал мато: уни қанча кўп кийиб ювсангиз, шунчалик юмшоқ бўлади.
Енгил жинсилар
Иссиқ ҳавода қалин деним кийиш бир оз ноқулай, лекин севимли жинсилардан воз кечиш ҳам мумкин эмас. Ёзда асосан енгил пахта матосидан тикилган шимлар айни муддао бўлади. Улар кўриниши билан одатий жинсиларни эслатади, лекин кийганингизда пижама каби қулайлик беради.
Кенг бичимли оқ жинсилар ҳам яхши танлов.
Миди-юбка
Шортик ва кўйлакларга муқобил сифатида миди-юбка яхши танлов. У танани сиқмайди, пошнага эҳтиёж қолмайди, енгиллик ва мувозанат ҳиссини яратади. Бундай турдаги юбкалар юриш учун ҳам қулай, шунингдек ҳавони ҳам яхши ўтказади.
Миди-юбкаларни қандай кийиш керак? Пахтадан тикилган кофта, калта топ, футболка ёки боди билан кийиш ҳам мумкин. Бу ҳам нафис, ҳам қулай кўриниш беради. Ёзда ушбу юбка гардеробингиздаги севимли кийимларингиздан бирига айланади ва у бемалол жинсилар ўрнини босиши мумкин.
Майка ёки боди
Сўнгги пайтларда пахта матосидан тикилган майкалар аёлларнинг севимли гардероб элементига айланмоқда. Уларни алоҳида ҳам, ёки енгли кофталар ичидан ҳам кийиш мумкин.
Майка жинси шим, юбка ҳамда костюмлар билан кийишга жуда мос келади. Бу яхши база бўлиб, устидан қандай кийимлар кийсангиз ҳам, ярашиб туради.
Кенг шимлар
Тўғри бичимли шимлар ҳар қандай қоматдаги аёлга мос келади. Жигарранг, оқ, оч кулранг ва какао ранглари ёз учун идеал ҳисобланади.
Бу шимлар деярли ҳамма нарса билан уйғунлашади: топ ва кофта шулар жумласидан. Тўғри бичимли шим кийганда оёғингизга кроссовка ёки балетка кийишингиз мумкин.
Изоҳ (0)