Хитойнинг Хунан провинциясига қарашли Хуайхуа шаҳрида яшовчи ўсмир йигит ота-онаси томонидан уйдан чиқариб юборилди ва молиявий таъминотдан бутунлай маҳрум қилинди.
Бу ҳолатга унинг олий таълим муассасаларига кириш учун мўлжалланган ягона давлат имтиҳони — “Гаокао”дан паст балл тўплагани сабаб бўлган. Йигит имтиҳондан 750 баллдан 575 балл тўплаган. Ота-онаси эса бу кўрсаткични юқори рейтингли университетга кириш учун етарли эмас, деб ҳисоблаган.
Сяокай исмли ўсмир ушбу воқеага қадар ота-онаси билан бирга яшаб келган. Бироқ бир куни унинг оила аъзолари уйнинг кириш эшигидаги кодни ўзгартириб, Сяокайни ичкарига киритмай қўйган. Йигитнинг таъкидлашича, оиласи уни хатоларини тушунишга мажбур қилиш мақсадида бундай кескин чорага қўл урган.
Сяокай кўчада қолганидан сўнг онасига қўнғироқ қилган. Аммо суҳбатда аёл хизмат сафарида эканини маълум қилган ва янги паролни билмаслигини айтган: “Биздан ёрдам кутма. Юқори синфларда сен ўз вазифангни бажариш ўрнига вақтни бекорга совурдинг. Дарсларга жиддий ёндашмадинг, белгиланган тартиб-интизомга амал қилмадинг. Ахир ҳаётда ҳеч бир жамият қоидаларсиз яшамайди-ку, тўғрими?” деган онаси. Суҳбат якунида у ўғлига: “Ҳар ким ўз ҳаётини алоҳида давом эттирсин”, деб қатъий фикр билдирган.
Фото: Sinxua
Йигит юзага келган ҳолат бўйича Hunan TV телеканалига мурожаат қилиб, жамоатчилик эътиборини тортди. Теледастур эфирида у ота-онасининг бундай кескин чораларидан норозилигини билдириб:
“Мен бошқаларнинг меҳрибон ва тушунадиган ота-онасига ҳавас қиламан. Аммо менинг ота-онам ўта қаттиққўл одамлар. Улар мени бўйсундириш учун фақат ана шундай чораларгагина таянишади”, деди у.
Ота-онасининг таъкидлашича, уларнинг норозилиги фақат имтиҳон натижалари билан эмас, балки ўғлининг мобил телефонга ортиқча берилиб кетгани билан боғлиқ. Сяокай мактабнинг бошланғич босқичларида намунали ўқувчи бўлган, бироқ смартфон олганидан кейин дарсларни кўп қолдиришга одатланиб қолган. Ота эса ўғлига шарт қўйган: у уйга қайтиб, ота-онасининг талабларига сўзсиз бўйсунади ёки мустақил ҳаёт бошлаб, кунини кўраверади.
Мазкур ҳолат Хитойда таълимга ва фарзанд тарбиясига нисбатан ўта қатъий муносабат мавжудлигини кўрсатади.
Изоҳ (0)