Африка қитъасида ҳар йили 815 минг одам овқат тайёрлаш туфайли ҳаво ифлосланишидан ҳалок бўлади. Сабаби аҳоли очиқ осмон остида олов ва бошқа турли заҳарли ёқилғи билан овқат тайёрлашга мажбур бўлади. Бу ҳақда Arab News хабар берди.
Халқаро энергетика агентлиги ҳисоботида айтилишича, ушбу муаммо ҳар йили авиация саноати чиқарадиган миқдорда иссиқхона газларини юзага келтиради.
Дунё бўйлаб 2 миллиард киши ҳали ҳам очиқ ҳавода олов ёки бошқа ёқилғи (ёғоч, кўмир, қишлоқ хўжалиги чиқиндилари ёки тезак) ёрдамида овқат тайёрлайди. Африкада ҳар 5 та хонадондан 4 таси овқат пиширишда шу усулдан фойдаланади.
Ушбу заҳарли тутундан кўплаб нафас олиш ва юрак-қон томир касалликлари келиб чиқади: хусусан, бунда ўпка майда зарралар билан ифлосланади. Шунингдек, бу тутунлар глобал исишга қарши таъсир этадиган ўрмонларнинг йўқ бўлишига олиб келади.
Ҳисоб-китобларга кўра, Африка қитъасининг ўзида ҳар йили 815 мингта эрта ўлим содир бўлади. Бу асосан хавфсиз овқат пишириш усулларидан фойдаланиш имкониятининг йўқлиги оқибатида юзага келади. Аёллар ва болалар ҳаводан заҳарланишдан энг кўп азият чекади.
Халқаро энергетика агентлиги 2024 йилнинг май ойида Парижда ушбу муаммо бўйича халқаро саммит ташкил этган. Бунинг натижасида Африка давлатларига 470 миллион доллар ажратилиб, маблағнинг аксарияти Малави ва Угандада печ заводи қурилиши дастурига йўналтирилган.
Аммо Саҳройи Кабирдан жанубдаги Африка давлатларида овқат тайёрлаш учун ёқилғи муаммоси ҳалигача долзарблигича қолмоқда. Бу ҳудудларда овқат пиширишда қийналаётган одамлар сони ўсишда давом этмоқда. Ушбу муммонинг муқобил ечимлар қаторига қуёш панелларидан электр энергияси олиш, табиий газ, айниқса суюлтирилган нефть гази, қазиб олинадиган ёқилғи кабилар киради.
Прогноз қилинишича, муқобил ечимлардан фойдаланиш 2040 йилга бориб Африка қитъасида 4,7 миллион эрта ўлимнинг олдини олади. Шу билан бирга, қитъанинг иссиқхона газлари чиқиндиларини йилига 540 миллион тоннага камайтиради.
Изоҳ (0)